Мэсія з роду Эфраіма

Мэсія з роду Эфраіма
משיח בן אפרים
Жанр:	раман
Аўтар:	Мойшэ Кульбак
Мова арыгіналу:	ідыш
Год напісаньня:	1923
Публікацыя:	1924
Электронная вэрсія

«Мэсія з роду Эфраіма» (на ідышы: משיח בן אפרים‎) — раман Мойшэ Кульбака, які быў напісаны ў Бэрліне й ўпершыню надрукаваны ў 1924 годзе ў Варшаве. Дзеяньні раману адбываюцца ў ваколіцах Смаргоні ў пачатку XX ст. Раман зьяўляецца адным зь яскравых прыкладаў творчасьці Мойшэ Кульбака, насычанай традыцыямі й калярытам, у якой можна сустрэцца з пэўнымі містычнымі зьявамі й фальклёрнымі матывамі.

Сюжэт

Дзеяньні раману-містэрыі адбываецца на пачатку ХХ стагодзьдзя ў лясох, палёх і мястэчках Беларусі, дзе 36 патаемных праведнікаў рыхтуюць сьвет да прыходу Мэсыі. Аўтар стварае фантасмагарычны сусьвет, абапіраючыся на старадаўні габрэйскі фальклёр, містычнае вучэньне кабалы, модную філязофію, дух беларускае прыроды й сваю багатую паэтычную фантазыю. У аснову рамана пакладзена габрэйская легенда з Талмуда пра тое, што на зямлі заўсёды жывуць 36 таемных сьвятых, безь незаўважнай дзейнасьці якіх рухне сьвет.

Галоўнымі героямі раману выступаюць млынар Бэня, вясковы аскет Сімха Плахта, вандроўны філёзаф Гімпэлэ і іншыя — душы, зьняволеныя ў сьвеце, прагнучыя сьвятла, ахопленыя дзіўнай трывогай, адпраўляюцца ў падарожжа, якое не мае вытлумачальнай мэты. Гэтыя героі зьяўляюцца схаванымі ламэдвоўнікамі(en) — праведнікамі. У гэтым фантастычным падарожжы, поўным гумару й містычных перажываньняў, паступова высьвятляецца прычына трывогі, якая не дае спакою вандроўнікам, — прыход Месіі на Літоўскую зямлю. Увесь час галоўныя героі раману шукаюць Мэсію, але патаемнай сілай пэрсанажаў раману зьяўляецца іх жаданьне прыйсьці на дапамогу людзям, якія патрабуюць дапамогі.

Пераклады

У 2019 годзе раман пераклаў на беларускую мову Сяргей Шупа, раман быў выдадзены выдавецтвамі Вясна й Янушкевіч.

У 2016 годзе раман быў выдадзены на польскай мове ў перакладзе Кшыштафа Чыжэўскага. У 2022 годзе раман быў выдадзены на летувіскай мове ў перакладзе Міндаўгаса Квяткаўскаса.