Міжнароднае студэнцкае спаборніцтва па матэматыцы
Каардынаты: 42°0′47″ пн. ш. 23°5′43″ у. д. / 42.01306° пн. ш. 23.09528° у. д.
| Міжнароднае студэнцкае спаборніцтва па матэматыцы | |
| Дысцыпліна | матэматыка |
|---|---|
| Дата зьяўленьня | 28 ліпеня 1994 (29 гадоў таму) |
| Арганізатар | Унівэрсытэцкі каледж Лёндану (Ангельшчына) |
| Дэвіз | Міжнароднае становіцца сусьветным |
| Колькасьць удзельнікаў | 70 унівэрсытэтаў (2018 г.) |
| Пляцоўка(-і) | Амэрыканскі ўнівэрсытэт у Баўгарыі (Благоеўград, з 2010 году) |
| Дзейны чэмпіён | Санкт-Пецярбурскі дзяржаўны ўнівэрсытэт (2) |
| Найбольш тытулаў | Будапэшцкі ўнівэрсытэт і Маскоўскі фізыка-тэхнічны інстытут (па 5) |
| Спонсар(ы) | «Вальфрамава дасьледаваньне» (Шампэйн, штат Іліной, ЗША), выдавецтва «Спрынгер» (Гайдэльбэрг, Нямеччына) |
| Заснавальнік | Эўрапейскі Зьвяз |
| Узровень у пірамідах | міжнародны |
| Фармат турніру | прадметная алімпіяда |
Міжнароднае студэнцкае спаборніцтва па матэматыцы (МССМ; анг. International Mathematics Competition for University Students, IMC) — штогадовая прадметная алімпіяда, якая ладзіцца з 1994 году між студэнтамі ўнівэрсытэтаў розных краінаў.
Цягам 2 дзён студэнты рашаюць 10 задачаў. Кожны дзень адводзіцца 5 гадзінаў на рашэньне 5 задачаў. Задачы ахопліваюць некалькі галінаў матэматыкі: матэматычны аналіз, лінейная і абстрактная альгебра, функцыянальны аналіз, аналітычная геамэтрыя, камбінаторыка і тэорыя лічбаў. Працоўнай мовай спаборніцтва ёсьць ангельская[1].
Мінуўшчына[рэдагаваць | рэдагаваць крыніцу]
28 ліпеня — 2 жніўня 1994 году ў Плоўдзіве (Баўгарыя) прайшло 1-е Міжнароднае студэнцкае спаборніцтва па матэматыцы (МССМ). Сярод 49 удзельнікаў узнагароды атрымалі 28 спаборнікаў з 6 краінаў Эўропы: 3 першыя («залатыя») ўзнагароды, 7 другіх («срэбраных»), 9 трэціх («бронзавых») і 9 ганаровых граматаў. Ад пачатку і да 1999 году Эўрапейскі Зьвяз фінансаваў спаборніцтва ў рамках Праграмы транс-эўрапейскай мабільнасьці ўнівэрсытэцкага навучаньня (ПТЭМУН; анг. TEMPUS). У жніўні 1996 году на 3-м спаборніцтве ў Плоўдзіве (Баўгарыя) ўпершыню выступілі студэнты з Азіі, якія прадстаўлялі Габрэйскі ўнівэрсытэт у Ерусаліме зь Ізраілю[2]. У ліпені 2000 году ў 7-м спаборніцтве ў Лёндане (Брытанія) ўпершыню ўдзельнічалі студэнты з Паўночнай Амэрыкі, якія прадстаўлялі 2 унівэрсытэты ЗША: Унівэрсытэт Аёвы і Масачусэцкі тэхналягічны інстытут. Таксама ўпершыню выступілі студэнты з Паўднёвай Амэрыкі, якія прадстаўлялі Ўнівэрсытэт Андаў (Багата) з Калюмбіі[3]. У ліпені 2009 году на 16-м МССМ у Будапэшце (Вугоршчына) ўпершыню выступілі студэнты з Афрыкі, якія прадстаўлялі 2 унівэрсытэты Анголы: Унівэрсытэт Агушцінью Нэту (Луанда) і Мэтадысцкі ўнівэрсытэт Анголы (Луанда)[4].
Пераможцы і месцы правядзеньня[рэдагаваць | рэдагаваць крыніцу]
На канец 2018 году 25 Міжнародных студэнцкіх спаборніцтваў па матэматыцы правялі ў 8 дзяржавах Эўропы, зь іх 17 у Баўгарыі. Першыя 4 спаборніцтвы 1994—1997 гадоў адбыліся ў Плоўдзіве. Звыш паловы (13) МССМ прайшло ў Благоеўградзе, у тым ліку кожнае з 2010 году. Таксама двойчы спаборніцтва прымала Вугоршчына. Больш як аднойчы пераможцамі спаборніцтва станавіліся каманды 8 унівэрсытэтаў з 7 краінаў Эўропы. Будапэшцкі ўнівэрсытэт (Вугоршчына) і Маскоўскі фізыка-тэхнічны інстытут (Расея) — па 5 разоў. Яшчэ 6 ВНУ перамагалі двойчы: Беларускі дзяржаўны ўнівэрсытэт (2003 і 2005), Карлаў унівэрсытэт (Чэхія), Кіеўскі нацыянальны ўнівэрсытэт імя Тараса Шаўчэнкі (Украіна), Санкт-Пецярбурскі дзяржаўны ўнівэрсытэт (Расея), Сафійскі ўнівэрсытэт (Баўгарыя) і Ягайлаўскі ўнівэрсытэт (Польшча).
| № | Дата | Горад (дзяржава) | Лік удзельнікаў (дзяржаваў) | ВНУ пераможцы (дзяржава) |
|---|---|---|---|---|
| 25 | 2018 г., 22—28 ліпеня | Благоеўград (Баўгарыя) | 351 (39) | Санкт-Пецярбурскі дзяржаўны ўнівэрсытэт (Расея) |
| 24 | 2017 г., 31 ліпеня — 6 жніўня | Благоеўград (Баўгарыя) | 331 (37) | Ізраільскі тэхналягічны інстытут |
| 23 | 2016 г., 25—31 ліпеня | Благоеўград (Баўгарыя) | 320 (36) | Маскоўскі фізыка-тэхнічны інстытут (Расея) |
| 22 | 2015 г., 27 ліпеня — 2 жніўня | Благоеўград (Баўгарыя) | 326 (35) | Санкт-Пецярбурскі дзяржаўны ўнівэрсытэт (Расея) |
| 21 | 2014 г., 29 ліпеня — 4 жніўня | Благоеўград (Баўгарыя) | 324 (36) | Тэль-Авіўскі ўнівэрсытэт (Ізраіль) |
| 20 | 2013 г., 6—12 жніўня | Благоеўград (Баўгарыя) | 321 (35)[1] | Маскоўскі фізыка-тэхнічны інстытут (Расея) |
| 19 | 2012 г., 26 ліпеня — 1 жніўня | Благоеўград (Баўгарыя) | 316 (38) | Маскоўскі фізыка-тэхнічны інстытут (Расея) |
| 18 | 2011 г., 23—29 ліпеня | Благоеўград (Баўгарыя) | 305 (38) | Ягайлаўскі ўнівэрсытэт (Польшча) |
| 17 | 2010 г., 24—30 ліпеня | Благоеўград (Баўгарыя) | 328 (33) | Кіеўскі нацыянальны ўнівэрсытэт імя Тараса Шаўчэнкі (Украіна) |
| 16 | 2009 г., 25—30 ліпеня | Будапэшт (Вугоршчына) | 347 (31) | Кіеўскі нацыянальны ўнівэрсытэт імя Тараса Шаўчэнкі (Украіна) |
| 15 | 2008 г., 25—31 ліпеня | Благоеўград (Баўгарыя) | 283 (27) | Будапэшцкі ўнівэрсытэт (Вугоршчына) |
| 14 | 2007 г., 3—9 жніўня | Благоеўград (Баўгарыя) | 249 (14) | Будапэшцкі ўнівэрсытэт (Вугоршчына) |
| 13 | 2006 г., 20—26 ліпеня | Адэса (Украіна) | 241 (25) | Ягайлаўскі ўнівэрсытэт (Польшча) |
| 12 | 2005 г., 22—28 ліпеня | Благоеўград (Баўгарыя) | 227 (29) | Беларускі дзяржаўны ўнівэрсытэт |
| 11 | 2004 г., 23—29 ліпеня | Скоп’е (Македонія) | 180 (26) | Будапэшцкі ўнівэрсытэт (Вугоршчына) |
| 10 | 2003 г., 25—31 ліпеня | Клуж-Напока (Румынія) | 185 (22) | Беларускі дзяржаўны ўнівэрсытэт |
| 9 | 2002 г., 19—25 ліпеня | Варшава (Польшча) | 182 (25) | Будапэшцкі ўнівэрсытэт (Вугоршчына) |
| 8 | 2001 г., 19—25 ліпеня | Прага (Чэхія) | 185 (21) | Будапэшцкі ўнівэрсытэт (Вугоршчына) |
| 7 | 2000 г., 26—31 ліпеня | Лёндан (Брытанія) | 117 (19) | Кембрыдзкі ўнівэрсытэт (Брытанія) |
| 6 | 1999 г., 29 ліпеня — 2 жніўня | Кэстхэй (Вугоршчына) | 87 (14) | Карлаў унівэрсытэт (Чэхія) |
| 5 | 1998 г., 29 ліпеня — 3 жніўня | Благоеўград (Баўгарыя) | >80 (10) | Карлаў унівэрсытэт (Чэхія) |
| 4 | 1997 г., 30 ліпеня — 4 жніўня | Плоўдзіў (Баўгарыя) | >70 (14) | Сафійскі ўнівэрсытэт (Баўгарыя) |
| 3 | 1996 г., 31 ліпеня — 5 жніўня | Плоўдзіў (Баўгарыя) | >82 (12) | Маскоўскі фізыка-тэхнічны інстытут (Расея) |
| 2 | 1995 г., 2—7 жніўня | Плоўдзіў (Баўгарыя) | >53 (7) | Маскоўскі фізыка-тэхнічны інстытут (Расея) |
| 1 | 1994 г., 28 ліпеня — 2 жніўня | Плоўдзіў (Баўгарыя) | 49 (6) | Сафійскі ўнівэрсытэт (Баўгарыя) |
Беларускі ўдзел[рэдагаваць | рэдагаваць крыніцу]
19—25 ліпеня 2001 году каманда Беларускага дзяржаўнага ўнівэрсытэту ў складзе 9 студэнтаў упершыню выступіла на 8-м Міжнародным студэнцкім спаборніцтве па матэматыцы, якое праходзіла ў Празе (Чэхія). Найлепшы вынік паказаў Трафім Ласы, які заняў 13-е абсалютнае месца сярод 185 удзельнікаў і атрымаў 1-ю ўзнагароду (127 балаў з 240 магчымых за 12 задачаў). Таксама 1-ю ўзнагароду атрымаў Іван Лосеў, які заняў 27-е месца (104 балы). Яшчэ 4 студэнты атрымалі 2-я ўзнагароды: Арцём Кохан — за 36-е месца і 93 балы, Зьміцер Бадзягін — за 45-е месца і 87 балаў, Аляксандар Вусьніч — за 47-е месца і 85 балаў, Аляксей Коранеў — за 52-е месца і 82 балы. Таксама Яўген Радына атрымаў 3-ю ўзнагароду і заняў 87-е месца (64 балы)[5]. На 9-м спаборніцтве 2002 году, што адбылося ў Варшаве (Польшча), каманда БДУ заняла 2-е месца. Пагатоў Іван Лосеў упершыню заняў 1-е абсалютнае месца (196 балаў). Таксама 1-я ўзнагароды атрымалі яшчэ 2 студэнты: Аляксандар Вусьніч — за 15-е месца (165 балаў), Трафім Ласы — за 22-е месца (156 балаў). Яшчэ 4 студэнты атрымалі 2-я ўзнагароды: Сяргей Маркоўскі — за 42 месца (140 балаў), Зьміцер Бадзягін — за 44-е месца (138 балаў), Давід Зьмяйкоў — за 59 месца (128 балаў), Іван Ражноў — за 65 месца (121 бал)[6]. У ліпені 2003 году на 10-м МССМ у Клуж-Напоцы (Румынія) каманда БДУ ўпершыню заняла 1-е месца. Пагатоў Аляксандар Вусьніч і Іван Лосеў падзялілі 1-е абсалютнае месца, атрымаўшы па 232 балы. Таксама 1-я ўзнагароды атрымалі яшчэ 6 студэнтаў БДУ: Зьміцер Бадзягін і Трафім Ласы — за 14-е месца (па 192 балы), Мікіта Селінгер — за 23-е (184 балы), Максім Жыховіч — за 29-е (176 балаў), Сяргей Маркоўскі — за 32-е (174 балы), Яўген Зорын — за 38-е (170 балаў). Давід Зьмяйкоў паўторна атрымаў 2-ю ўзнагароду (47-е месца і 162 балы). Зьміцер Дудко атрымаў 3-ю ўзнагароду за 75-е месца (136 балаў)[7].
У ліпені 2004 году на 11-м спаборніцтве ў Скоп’і (Македонія) каманда БДУ заняла 3-е месца. Студэнты БДУ атрымалі чатыры 1-я ўзнагароды і адну 2-ю. Таксама на спаборніцтве ўпершыню выступілі 2 студэнты, якія прадстаўлялі Гарадзенскі дзяржаўны ўнівэрсытэт. Зь іх Яўген Мікуліч атрымаў 3-ю ўзнагароду (82-месца, 98 балаў)[8]. У ліпені 2005 году на 12-м спаборніцтве ў Благоеўградзе (Баўгарыя) каманда БДУ 2-і раз заняла 1-е месца. Пагатоў Мікіта Селінгер заняў 1-е абсалютнае месца (208 балаў). Узнагароды 1-й ступені таксама атрымалі яшчэ 5 студэнтаў БДУ: Вікторыя Лебедзь і Сяргей Маркоўскі — 6-е месца (па 182 балы), Максім Жыховіч — 13-е (172 балы), Алена Пірутка — 19-е (162 балы), Зьміцер Дудко — 25-е (154 балы). Таксама 3-ю ўзнагароду атрымаў Юры Раманоўскі (118-е месца, 97 балаў). Каманда Гарадзенскага ўнівэрсытэту заняла 22-е месца сярод 71 ВНУ[9]. Яўген Мікуліч атрымаў 1-ю ўзнагароду за 49-е месца (130 балаў). Яўген Жыдок — ганаровую грамату за 191 месца (49 балаў)[10]. 6-12 жніўня 2013 году на 20-м спаборніцтве, што праходзіла ў Благоеўградзе, каманда БДУ заваявала 3 мэдалі. Сярод студэнтаў Факультэту дастасоўнай матэматыкі і інфарматыкі (ФДМІ) БДУ залатую ўзнагароду атрымаў 3-курсьнік Сяргей Фінскі, «срэбра» — 3-курсьнік Уладзіслаў Стажынскі і 4-курсьнік Арцём Говараў. Да 2014 году студэнты БДУ заваявалі 37 залатых, 30 срэбраных і 5 бронзавых узнагародаў[1].
Глядзіце таксама[рэдагаваць | рэдагаваць крыніцу]
Крыніцы[рэдагаваць | рэдагаваць крыніцу]
- ^ а б в Надзея Нікалаева. У матэматычных баталіях студэнты БДУ — «асы» // Зьвязда : газэта. — 15 жніўня 2013. — № 151 (27516). — С. 3. — ISSN 1990-763x.
- ^ Вынікі 3-га МССМ 1996 году (анг.) // Міжнароднае студэнцкае спаборніцтва па матэматыцы, 2018 г. Праверана 8 верасьня 2018 г.
- ^ Вынікі 7-га МССМ 2000 году (анг.) // Міжнароднае студэнцкае спаборніцтва па матэматыцы, 2018 г. Праверана 8 верасьня 2018 г.
- ^ Канчатковыя вынікі 16-га МССМ 2009 году (анг.) // Міжнароднае студэнцкае спаборніцтва па матэматыцы, 2018 г. Праверана 8 верасьня 2018 г.
- ^ Канчатковыя вынікі 8-га МССМ 2001 году (анг.) // Міжнароднае студэнцкае спаборніцтва па матэматыцы, 2018 г. Праверана 8 верасьня 2018 г.
- ^ Канчатковыя вынікі 9-га МССМ 2002 году (анг.) // Міжнароднае студэнцкае спаборніцтва па матэматыцы, 2018 г. Праверана 8 верасьня 2018 г.
- ^ Канчатковыя вынікі 10-га МССМ 2003 году (анг.) // Міжнароднае студэнцкае спаборніцтва па матэматыцы, 2018 г. Праверана 8 верасьня 2018 г.
- ^ Канчатковыя вынікі 11-га МССМ 2004 году (анг.) // Міжнароднае студэнцкае спаборніцтва па матэматыцы, 2018 г. Праверана 8 верасьня 2018 г.
- ^ Табліца ўзнагародаў унівэрсытэтаў на МССМ 2005 году (анг.) // Міжнароднае студэнцкае спаборніцтва па матэматыцы, 2018 г. Праверана 8 верасьня 2018 г.
- ^ Канчатковыя вынікі МССМ 2005 году (анг.) // Міжнароднае студэнцкае спаборніцтва па матэматыцы, 2018 г. Праверана 8 верасьня 2018 г.
Вонкавыя спасылкі[рэдагаваць | рэдагаваць крыніцу]
- Кантакт (анг.) // Міжнароднае студэнцкае спаборніцтва па матэматыцы, 2018 г. Праверана 8 верасьня 2018 г.