Вікіпэдыя:Будзьце рашучымі

Скарачэньне: ВП:БР

Ня бойцеся рэдагаваць!

Супольнасьць Вікіпэдыі заахвочвае сваіх удзельнікаў не саромецца выпраўляць артыкулы. Калі кожны будзе дадаваць свой унёсак у разьвязаньне праблемаў, такіх як дапаўненьне артыкулаў фактамі, выпраўленьне артаграфіі, граматыкі, стылю і г. д., гэта дапаможа нашай Вікіпэдыі разьвівацца. Нам патрэбная дапамога кожнага ўдзельніка. Пэўна, ня раз вы чыталі нейкі артыкул і думалі: «Чаму тут няма вось гэткіх зьвестак?» альбо «Чаму б не паправіць вось тут і тут?» Вікіпэдыя дазваляе вам рабіць гэта, больш за тое, яна для гэтага й створаная. Канечне, яна патрабуе цывілізаванага падыходу і карэктнасьці, але гэта дзейнічае. Пабачыце.

Вашыя рэдагаваньні абавязкова будуць заўважаныя і, магчыма, зьмененыя іншымі ўдзельнікамі праекту. Не прымайце гэтага блізка да сэрца! Яны таксама, як і ўсе з нас, хочуць палепшыць Вікіпэдыю настолькі, наколькі гэта ўвогуле магчыма.

Калі вы ўбачыце на старонцы гутарак да пэўнага артыкулу канфлікт, не праходзьце міма. Будзьце рашучымі і дадайце сваё меркаваньне.

...але асьцярожна

Хоць упэўненасьць удзельнікаў Вікіпэдыі ёсьць адной з найкаштоўных якасьцей, усё ж ня варта кідацца рабіць велізарныя неабдуманыя рэдагаваньні ў памкненьнях зрабіць усё й адразу. Хаця любыя выпраўленьні могуць быць скасаваныя практычна бязь цяжкасьцяў, калі яны будуць прызнаныя шкоднымі. Галоўнае — не турбавацца, заўважыўшы, што пасьля вас нехта вырашыў зрабіць усё іначай.

Некаторыя рэдагаваньні могуць выклікаць больш значныя наступствы, як у лепшы, так і ў горшы бакі. Гэта тычыцца правак спэцыяльных старонак, стварэньня новых катэгорыяў ці, напрыклад, перайменаваньняў старонак. Таму перад падобнымі выпраўленьнямі ўпэўніцеся, калі ласка, што вы добра ўсьведамляеце ўсе наступствы, ці спытайцеся парады.

«Be Bold» стаўся нефармальным дэвізам Вікіпэдыі

Таксама варта асьцярожна ставіцца да ўнясеньня зьменаў у вялізныя артыкулы, артыкулы на складаныя тэмы, артыкулы зь вялікай гісторыяй выпраўленьняў, а таксама ў «Абраныя артыкулы». У большасьці выпадкаў зьмест такіх артыкулаў сфармаваўся пад уплывам дамоўленасьцяў паміж удзельнікамі Вікіпэдыі з абсалютна рознымі кропкамі погляду. Таму неабдуманая праўка такога артыкула можа абудзіць зьвера, што выкліча ланцуговую рэакцыю паўторных выпраўленьняў. Калі ж вы тым ня менш зьбіраецеся зрабіць значны дадатак у артыкул па спрэчнай тэме, будзе лепш найперш прачытаць артыкул цалкам, а таксама старонку гутарак да гэтага артыкула. Магчыма, варта перад унясеньнем вялізнага выпраўленьня выкласьці сваю думку на старонцы гутарак ды пачакаць прынамсі дзень, пакуль іншыя ўдзельнікі атрымаюць магчымасьць азнаёміцца з вашым меркаваньнем. Калі пратэстаў ня будзе, дадавайце свае зьмены, не забываючыся карыстацца полем «Кароткае апісаньне зьменаў», каб іншым было лягчэй арыентавацца ў гісторыі зьмяненьняў старонкі.

Ну а відавочныя памылкі ў Вікіпэдыі патрэбна выпраўляць, не чакаючы рэакцыі іншых удзельнікаў, і, зразумела, з дапаўненьнем слушнымі зьвесткамі.

Гаворачы словамі Эдмунда Спэнсара, «Будзьце рашучымі, будзьце рашучымі, будзьце рашучымі ўсюды», аднак «Не захапляйцеся».

Неэнцыкляпэдычныя старонкі

З асаблівай асьцярогай трэба ставіцца да рэдагаваньня іншых старонак, якія існуюць для падтрыманьня дзеяздольнасьці Вікіпэдыі. У дадзеным выпадку болей падыходзіць выраз «ня будзьце неабачлівыя».

Дапаўненьні ці выпраўленьні ў катэгорыях і шаблёнах Вікіпэдыі могуць выклікаць значныя наступствы, бо падобныя праўкі звычайна выклікаюць зьмяненьне зьместу мноства старонак. А шаблёны Вікіпэдыі могуць утрымліваць складаны код, слушнасьць якога цяжка прааналізаваць на выгляд, без тэставаньня. Што праўда, адкаціць зьмены ў такім разе будзе значна прасьцей, чым выпраўляць дададзеныя хібы.

Калі вы зьбіраецеся загрузіць новую выяву ці іншы мэдыяфайл, варта ўпэўніцца, што файл з такім сама імем яшчэ адсутнічае, каб ня страціць яго. Калі ж гэтак здараецца — што ж, будзьце рашучымі ў дабаўленьні апісаньня да раней загружанага файла. Гэта дапаможа прасьцей яго адшукаць.

Непажадана рэдагаваць асабістыя старонкі іншых удзельнікаў ці камэнтары, пакінутыя імі на старонках абмеркаваньняў. Аднак выдаленьне вандалізму заўжды вітаецца нават на гэтых старонках.

Глядзіце таксама

• Рэдагаваньне артыкулаў