Хартыя’97

Хартыя’97 — беларуская грамадзянская ініцыятыва, якая была накіраваная на праваабарончую дзейнасьць і на аб’яднанне палітычных сілаў, апазыцыйных да рэжыму Аляксандра Лукашэнкі.

Хартыя’97 была складзеная па аналёгіі з Хартыяй’77 — дэклярацыяй, што абвесьціла прынцыпы пераадоленьня таталітарызму і аднаўленьня дэмакратыі ў Чэхаславаччыне. Хартыя’97 была абвешчаная 10 лістапада 1997 года. Хартыя канстатавала парушэньні правоў чалавека ў Беларусі, разбурэньне нацыянальнай культуры. Яе аўтарамі і ініцыятарамі выступілі журналісты незалежных сродкаў масавай інфармацыі, яе тэкст быў апублікаваны ў вядучых незалежных газэтах таго часу: «Имя», «БДГ», «Народная воля», «Свабода», «Свободные новости» і іншых.

У арганізацыйны камітэт грамадзкай ініцыятывы ў розны час уваходзілі Андрэй Саньнікаў, Аляксандр Мілінкевіч, Уладзімер Мацкевіч, Віктар Івашкевіч, Людміла Гразнова, Пётр Марцаў, Юры Хашчавацкі і іншыя вядомыя дзеячы. Першымі пад тэкстам Хартыі’97 паставілі подпісы 100 вядомых у краіне палітыкаў, грамадзкіх і культурных дзеячаў, журналістаў. Пазней дакумент падпісалі больш за 100 000 грамадзян Беларусі.

charter97.org

У апошнія гады ініцыятыва вядомая галоўным чынам праз сайт свайго прэс-цэнтра, які ператварыўся ў адзін з найбольш папулярных інфармацыйных сайтаў беларускага інтэрнэта. У беларускай благасфэры сайт «Хартыя’97» часта крытыкуецца за сваю неаб’ектыўнасьць.

Вонкавыя спасылкі

• Сайт Хартыі’97