Юлія Цімафеева

Юлія Цімафеева
Асабістыя зьвесткі
Нарадзілася	12 студзеня 1982(1982-01-12) (42 гады) Сьпярыжжа[d], Чамярыскі сельсавет, Брагінскі раён, Гомельская вобласьць, БССР, СССР
Сужэнец	Альгерд Бахарэвіч
Літаратурная дзейнасьць
Род дзейнасьці	паэтэса, перакладчыца
Жанр	верш, пераклад
Мова	беларуская мова і ангельская мова
Прэміі	Узнагарода ГА “СБП” «Экслібрыс» (2012)
Узнагароды	Дэбют (2018) Прэмія імя Карласа Шэрмана (2021)
Юлія Цімафеева ў Вікісховішчы

Юлія Цімафеева (нар. 12 студзеня 1982, в. Сьпярыжжа, Брагінскі раён) — беларуская літаратарка, перакладчыца.

Скончыла факультэт ангельскай мовы МДЛУ, Беларускі Калегіюм, наведвала Перакладніцкую майстэрню. Адна з заснавальніц і рэдактарак інтэрнэт-часопісу перакладной літаратуры «ПрайдзіСвет». Жыве ў Менску.

Аўтарка зборніка "Кніга памылак" ("Галіяфы", 2014), у які ўвайшлі ня толькі вершы, але і пераклады замежнай паэзіі, пераважна ангельскамоўнай (Ўолт Ўітмэн, Стывэн Крэйн, Чарлз Букоўскі, Эдрыен Рыч). Перакладала таксама з партугальскай (Албэрту Каэйру) і гішпанскай (Актавіё Пас) моваў.

У 2014 годзе ў выдавецтве Зьмітра Коласа выйшла яе другая кніга паэзіі "Цырк", якая трапіла ў кароткі сьпіс прэміі Натальлі Арсеньневай.

Яе паасобныя вершы перакладаліся на ангельскую, нямецкую, чэскую, славенскую, швэдзкую і іншыя мовы. У 2018 годзе люблінскае выдавецтва "Warsztaty Kultury" выдала першую паэтычную кнігу Юлі Цімафеевай па-польску "Cyrk i inne wiersze" у перакладзе Богдана Задуры.

Яе ўласныя пераклады прозы і паэзіі розных аўтараў зьяўляліся ў часопісах «pARTizan», «ПрайдзіСвет», «Паміж», «ARCHE», «Дзеяслоў», газэце «Літаратурная Беларусь».

У 2018 разам з Ганнай Комар і Натальляй Бінкевіч стала лаўрэаткай прэміі «Дэбют» за паэтычныя пераклады з кнігі Чарлза Букоўскі "сьвятло, і паветра, і месца, і час".

Удзельніца міжнароднага літаратурнага фэстывалю ў г. Біржы (Летува), фэстывалю "Вершы на асфальце" ў Менску, выступала на міжнародным кніжным кірмашы ў Гётэборгу (Швэцыя). Пераможца ў прозе конкурсу для маладых пісьменьнікаў «Экслібрыс», арганізаванага ГА «СБП» у 2012 г.

Былая вядоўцай культурніцкай тэлеперадачы "Рэмарка" на тэлеканале Белсат (разам зь Сяргеем Харэўскі і Аляксеем Стрэльнікавым).

Жонка пісьменьніка Альгерда Бахарэвіча.

Сябра Саюза беларускіх пісьменьнікаў і Беларускага ПЭН-цэнтру.

Вонкавыя спасылкі

• Юля Цімафеева ў каталёгу Нацыянальнай бібліятэкі Беларусі
• Алена Карп на Радыё Свабода пра кнігу "Цырк" Юлі Цімафеевай
• Ціхан Чарнякевіч на Радыё Свабода пра "Кнігу памылак" Юлі Цімафеевай
• Юля Цімафеева на сайце Выдавецкага дому ЛогвінаЎ
• Старонка Юлі Цімафеевай на сайце Літрадыё
• "Cyrk i inne wiersze" на сайце выдавецтва "Warsztaty Kultury"
• Кніга памылак" Юлі Цімафеевай на сайце bookster
• «Распранайся!» Юлія Цімафеева Камунікат
• Інтэрвію на сайце budzma.org