Пётар Мятла

Пётар Мятла
Пасол польскага Сойму
1922 — 1927
Асабістыя зьвесткі
Нарадзіўся:	1890 в. Кухцінцы, Дзісенскі павет
Памёр:	12 жніўня 1938 Беламорска-Балтыйскі канал
Партыя:	КПЗБ, БСРГ
Адукацыя:	Дзісенскае гарадское вучылішча[d] Аляксееўская вайсковая вучэльня[d]
Пётар Мятла ў Вікісховішчы

Пётар Васільевіч Мятла (1890, в. Кухцінцы, Дзісенскі павет, цяпер Мёрскі раён — 12 жніўня 1938, Беламорска-Балтыйскі канал) — беларускі грамадзка-палітычны дзяяч. Пасол польскага сойму ў 1922—1927.

У 1906—1910 навучаўся ў Дзісенскай гарадзкой вучэльні, у 1911—1912 на пэдагагічных курсах у Коўне. Працаваў настаўнікам.

У 1914—1917 у расейскім войску; вучыўся ў Аляксееўскай ваеннай вучэльні, юнкеры якой у 1917 выступілі супраць бальшавікоў. Арыштаваны разам зь іншымі юнкерамі.

З канца 1917 да 1921 настаўнічаў на Дзісеншчыне. З 1921 у Вільні. Працаваў у каапэрацыі. Удзельнічаў у стварэньні беларускіх школ.

Абраны ад Блёка нацыянальных Меньшасьцяў паслом польскага сойму ў 1922 годзе, ад сьвянцянскай акругі № 64. Сябра Беларускага пасольскага клюбу.

з 1926 сябра КПЗБ. Адзін са стваральнікаў і сябраў ЦК БСРГ. Рэдактар грамадоўскіх газэт. Аўтар публікацыі пра паездку з паслом Ярэмічам у 1924 у Менск.

Арыштаваны 16 студзеня 1927 у Валожыне польскімі ўладамі, нягледзячы на мандат пасла па справе Грамады. Сьледчы судзьдзя на падставе сабраных доказаў адразу прад’явіў абвінавачваньне . У 1928 на «працэсе 56-ці» атрымаў вырак 12 год турмы.

Дзякуючы абмену палітычнымі вязьнямі з 1930 у БССР. У 1932—1933 старшыня Камісіі па вывучэньні Заходняй Беларусі АН БССР. Жыў у Менску на вул. Савецкая, д. 89.

Арыштаваны 1 верасьня 1933 годзе па справе «Беларускага нацыянальнага цэнтру». 9 студзеня 1934 «як кіраўнік і арганізатар БНЦ» судовай калегіяй АДПУ СССР прыгавораны да расстрэлу. Расстрэл заменены 10 гадамі лягэру. Накіраваны на будаўніцтва Беламорска-Балтыйскага канала. Тамака памёр 12 жніўня 1938.

Рэабілітаваны 16 жніўня 1956 Вайсковым трыбуналам Беларускай вайсковай акругі. Справа № 10182-с; захоўваецца ў архіве КДБ Беларусі.

Літаратура

• Мятла Пётар // Кандыбовіч С. Разгром нацыянальнага руху ў Беларусі — Менск: БГА, 2000.— 160 с. ISBN 985-6374-15-4.
• Слоўнік Маракова // Маракоў Л.У. Рэпрэсаваныя літаратары, навукоўцы, работнікі асветы, грамадскія і культурныя дзеячы Беларусі, 1794—1991. Энц. даведнік. У 10 т. Т. 2. — Мн:, 2003. ISBN 985-6374-04-9.

Вонкавыя спасылкі

• МЯТЛА Пётр Васільевіч // «Адраджэнцы Беларусі», выданьне культурна-асьветнага клюбу «Спадчына», прысьвечанае 90-годзьдзю абвяшчэньня незалежнасьці Беларускай Народнай Рэспублiкi.