Кінгман

Выгляд Рыфа Кінгмана з борта гідраплана.

Рыф Кі́нгмана (па-ангельску: Kingman Reef) – незаселены каралавы рыф у паўночнай частцы Ціхага акіяна. Плошча паверхні складае 1 км². Рыф знаходзіцца пад юрысдыкцыяй Злучаных Штатаў Амэрыкі. Самая высокая кропка ўздымаецца на 1 мэтар над узроўнем мора, пад час прыліваў рыф знаходзіцца пад вадой.

Гісторыя

Рыф быў адкрыты ў 1789 годзе капітанам Эдмундам Фанінгам. Першым чалавекам, які дакладна дасьледаваў і апісаў рыф быў капітан В.Е. Кінгман, які высадзіўся тут у 1853 годзе і з гэтага часу рыф атрымаў сучасную назву. У 1859 годзе вялікія радовішчы гуана на рыфе Кінгмана заінтарасавалі амэрыканскія кампаніі, яле да прамысловай здабычы не дайшло. У 1922 годзе кампанія Пальміра Копра Компані абвясьціла рыф амэрыканскай тэрыторыяй і пабудавала тут рыбацкую базу. З 1937 да 1938 года рыф выкарыстоўваўся авіякампаніяй ПанАм як пункт запраўкі гідрапланаў на лініі Гаваі – Амэрыканскае Самоа. Пад час Другой Сусьветнай вайны рыф Кінгмана быў перададзены ў карыстаньне амэрыканскага войска, але ніякай дзейнасьці тут не было. Пасьля вайны кіраваньне над рыфам атрымала Міністэрства Вайскова-Марскога Флота ЗША.

Сучаснасьць

З 18 студзеня 2001 года рыф Кінгмана быў абвешчаны прыродаахоўнай зонай, які кіруецца Мінстэрствам Замежных спраў ЗША і Прыродаахоўным агенцтвам ЗША. Тэрыторыя зоны ахоплівае рыф і мора ў радыюсе 12 міляў вакол яго.

Вонкавыя спасылкі

Кінгман — сховішча мультымэдыйных матэрыялаў