Сьвятаслаў Коўш

Сьвятаслаў Коўш
Дата нараджэньня	25 сьнежня 1916(1916-12-25)
Месца нараджэньня	Разань, Расейская імпэрыя
Дата сьмерці	1997
Месца сьмерці	Саўт-Рывэр, Мідлсэкс[d], Нью-Джэрзі, ЗША
Месца пахаваньня	Беларускія могілкі ў Саўт-Рывэры
Месца вучобы	Віленскі ўнівэрсытэт Віленская беларуская гімназія
Занятак	пісьменьнік
Сябра ў	Беларускі студэнцкі саюз
Бацька	Аляксандар Коўш

Сьвятаслаў Коўш (25 сьнежня 1916, Разань — 5 лістапада 1997, Саўт-Рывэр, ЗША) — беларускі рэлігійна-грамадзкі дзеяч, пісьменьнік.

Нарадзіўся ў сям’і беларускіх бежанцаў, выхадцаў з Вялейскага павету, сын праваслаўнага сьвятара Аляксандра Коўша. Выпускнік Віленскай беларускай гімназіі (1934). Вучыўся на юрыдычным факультэце Віленскага ўнівэрсытэту. Сябра Беларускага студэнцкага саюзу.

Пасьля заканчэньня ўнівэрсытэту пасьвячоны ў дыяканы. Быў псаломшчыкам у вёсцы Засульле (цяпер Стаўбцоўскі раён). З 1939 года завуч сярэдняй школы ў Стаўбцоўскім раёне.

Падчас 2-ой сусьветнай вайны быў старшынёй Клецкага павету (1941—1944). З 1944 году ў нямеччыне, камэндант беларускага лягеру для перамешчаных асоб у Ватэнштэце, арганізаваў беларускую гімназію імя М. Багдановіча і пачатковую школу.

З 1949 года жыў у ЗША. 6 ліпеня 1969 году высьвячаны на сьвятара. У 1969—1977 гадах — настаяцель беларускага прыходу Сьв. Кірылы Тураўскага ў Рычманд-Гіле (Нью-Ёрк).

З 1970 года чалец эпархіяльнай рады Беларускай праваслаўнай царквы Паўночнай Амэрыкі і Канады. У 1976—1786 гадах — настаяцель прыхода Сьв. Ефрасіньні Полацкай у г. Саўт-Рывэр (штат Нью-Джэрсі).

З 1977 году выбраны адміністратарам беларускіх праваслаўных прыходаў ЗША і Канады, якія падлягаюць юрысдыкцыі Канстантынопальскага патрыярхату.

У 1976—1988 гадах старшыня Беларуска-Амэрыканскага дапамогавага камітэту і рэдактар праваслаўнага часопісу «Царкоўны Сьветач».

Выдаваў «Беларускі праваслаўны каляндар». Аўтар кнігі баляд і прозы «Русалчына баляда», аповесьці «На дарогах вайны» і інш.

Пахаваны на беларускіх праваслаўных могілках у г. Саўт-Рывэр.

Літаратура

• Кіпель В. Беларусы ў ЗША. — Мн., 1993.
• Календарыюм // «Czasopis» № 12/2006.