Голас працы

Голас працы
Тып	два разы ў тыдзень
Заснаваная	14 красавіка 1928
Палітыка	Беларуская сялянска-работніцкая грамада
Мова	беларуская
Штаб-кватэра	Вільня, Віленская вул. 12-6

«Голас працы» — газэта рэвалюцыйна-дэмакратычнага кірунку ў Заходняй Беларусі. Выдавалася з 14 красавіка па 30 траўня 1928 у Вільні на беларускай мове 2 разы на тыдзень.

Выходзіла пасьля закрыцьця газэты «Красавік». Пасьля закрыцьця гэтага выданьня пачала выдавацца пад назвай «Зара працы».

Іншыя назвы

У сувязі з рэпрэсіямі польскіх улад выдаўцы 15 разоў мянялі назву газэты:

• «Наша праца» (1—29 кастрычніка 1927),
• «Праца» (5—23 лістапада 1927),
• «Права працы» (7—24 сьнежня 1927),
• «Навагодняя праца» (27 сьнежня 1927),
• «Думка працы» (4—28 студзеня 1928),
• «Сіла працы» (1—24 лютага 1928),
• «Воля працы» (12—31 сакавіка 1928),
• «Красавік» (5 красавіка 1928),
• «Голас працы» (14 красавіка—30 траўня 1928),
• «Зара працы» (2—29 чэрвеня 1928),
• «Сьцяг працы» (4—31 ліпеня 1928),
• «Доля працы» (3—29 жніўня 1928),
• «Рэха працы» (1-29 верасьня 1928),
• «Слова працы» (5—31 кастрычніка 1928),
• «За працу» (5—27 лістапада 1928),
• «Да працы» (1—16 сьнежня 1928)

Гісторыя

Мела рубрыкі «Палітычная хроніка», «Выбарная хроніка», «3 сэйму» і інш. Пісала пра цяжкае сацыяльна-эканамічнае становішча працоўных Заходняй Беларусі, нацыянальна-вызваленчы рух, рознагалосьсі паміж прадстаўнікамі ідэй сацыялістычнай і нацыянальнай арыентацыі ў барацьбе за сацыяльнае і нацыянальнае вызваленьне, гісторыю стварэьння і дзейнасьць розных партый і арганізацый, у т. л. БСРГ, Польскай сацыялістычнай партыі, Беларускай хрысьціянскай дэмакратыі, Беларускага сялянскага саюза і інш.

Асьвятляла падрыхтоўку, выбары і работу польскага сэйму, інфармавала пра ход судовага працэсу над дзеячамі БСРГ. На старонках газэты зьмешчаны выступы беларускіх паслоў у польскім сэйме, артыкулы з нагоды 10-й гадавіны незалежнасьці Польшчы, матэрыялы пра культурнае жыцьцё ў Заходняй Беларусі, вершы М. Васілька, Х. Ільяшэвіча, А. Салагуба, В. Таўлая і інш., пад рубрыкай «Маленькі фэльетон» матэрыялы І. Маразовіча (пад псэўд. Я. Маланка), пераклады на беларускую мову асобных твораў У. Караленкі.

Разам выйшла каля 120 нумароў, з іх больш за 50 канфіскавана. Зачынена польскімі ўладамі.

Літаратура

• Говін, С. «Да працы» / Сцяпан Говін // Энцыклапедыя гісторыі Беларусі. У 6 т. / Беларус. Энцыкл.; Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн.: БелЭн, 1996. — Т. 3: Гімназіі — Кадэнцыя. — 527 с. — ISBN 985-11-0041-2 — С. 184.