Ліга Эўропы УЭФА

Ліга Эўропы УЭФА

Ліга Эўропы УЭФА (па-ангельску: UEFA Europa League) — штогадовы эўрапейскі футбольны кубкавы турнір, які праводзіцца пад эгідаю УЭФА; другі па значнасьці пасьля Лігі чэмпіёнаў. Першапачатковая назва — Кубак кірмашоў (па-ангельску: Inter-Cities Fairs Cup), потым — Кубак УЭФА (па-ангельску: UEFA Cup). З сэзону 2009—2010 гадоў кубак зьмяніў фармат і назву і стаў звацца Ліга Эўропы.

Фармат турніру (пачынаючы з сэзону 2009—2010 гадоў): 4 кваліфікацыйныя раўнды (чацьверты раўнд кваліфікацыі афіцыйна завецца раўндам плэй-оф), групавы турнір і плэй-оф (пачынаючы з 1/16 фіналу). Усе раўнды кваліфікацыі і плэй-оф (за выключэньнем фіналу) складаюцца з двух матчаў. Фінал складаецца з аднаго матчу на выбраным загадзя полі.

У лізе маюць права ўдзельнічаць уладальнікі кубкаў сваіх краін і каманды, якія занялі адпаведныя месцы ў сваіх чэмпіянатах. У залежнасьці ад месца іх краіны ў табліцы каэфіцыентаў УЭФА каманды пачынаюць барацьбу з таго ці іншага раўнду кваліфікацыі. Таксама ў чацьвертым кваліфікацыйным раўндзе да іх далучаюцца клюбы, якія прайгралі ў трэцім кваліфікацыйным раўндзе Лігі чэмпіёнаў. Пераможцы чацьвертага раўнду Лігі Эўропы, а таксама каманды, якія прайгралі ў чацьвертым кваліфікацыйным раўндзе Лігі чэмпіёнаў, гуляюць у групавым турніры (12 групаў па 4 каманды, якія гуляюць паміж сабою ў два колы). Па дзьве найлепшыя каманды з кожнай групы, а таксама 8 клюбаў, якія занялі трэцяе месца ў сваіх групах групавога этапу Лігі чэмпіёнаў, выходзяць у плэй-оф Лігі Эўропы. З сэзону 2015—2016 гадоў пераможца папярэдняга розыгрышу Лігі Эўропы атрымлівае права на ўдзел у Лізе чэмпіёнаў.

Турнір быў заснаваны ў 1971 годзе. Найбольшую колькасьць разоў (чатыры) яго выйграваў гішпанскі клюб «Сэвільля», які зьяўляецца дзейным пераможцам.

Пераможцы

• 2014/2015 — Сэвільля (Гішпанія)
• 2013/2014 — Сэвільля (Гішпанія)
• 2012/2013 — Чэлсі (Лёндан, Ангельшчына)
• 2011/2012 — Атлетыка (Мадрыд, Гішпанія)
• 2010/2011 — Порту (Партугалія)
• 2009/2010 — Атлетыка (Мадрыд, Гішпанія)
• 2008/2009 — Шахтар (Данецк, Украіна)
• 2007/2008 — Зэніт (Санкт-Пецярбург, Расея)
• 2006/2007 — Сэвільля (Гішпанія)
• 2005/2006 — Сэвільля (Гішпанія)
• 2004/2005 — ЦСКА (Масква, Расея)
• 2003/2004 — Валенсія (Гішпанія)
• 2002/2003 — Порту (Партугалія)
• 2001/2002 — Фэеноорд (Ратэрдам, Нідэрлянды)
• 2000/2001 — Лівэрпул (Ангельшчына)
• 1999/2000 — Галатасарай (Стамбул, Турэччына)
• 1998/1999 — Парма (Італія)
• 1997/1998 — Інтэрнацыянале (Мілян, Італія)
• 1996/1997 — Шальке 04 (Гэльзэнкірхэн, Нямеччына)
• 1995/1996 — Баварыя (Мюнхэн, Нямеччына)
• 1994/1995 — Парма (Італія)
• 1993/1994 — Інтэрнацыянале (Мілян, Італія)
• 1992/1993 — Ювэнтус (Турын, Італія)
• 1991/1992 — Аякс (Амстэрдам, Нідэрлянды)
• 1990/1991 — Інтэрнацыянале (Мілян, Італія)
• 1989/1990 — Ювэнтус (Турын, Італія)
• 1988/1989 — Напалі (Нэапаль, Італія)
• 1987/1988 — Баер (Левэркузэн, Нямеччына)
• 1986/1987 — Гётэборг (Швэцыя)
• 1985/1986 — Рэал Мадрыд (Гішпанія)
• 1984/1985 — Рэал Мадрыд (Гішпанія)
• 1983/1984 — Тотэнгэм Готспур (Лёндан, Ангельшчына)
• 1982/1983 — Андэрлехт (Брусэль, Бэльгія)
• 1981/1982 — Гётэборг (Швэцыя)
• 1980/1981 — Іпсўіч Таўн (Ангельшчына)
• 1979/1980 — Айнтрахт (Франкфурт-на-Майне, Нямеччына)
• 1978/1979 — Барусія (Мёнхэнглядбах, Нямеччына)
• 1977/1978 — ПСВ (Эйндговэн, Нідэрлянды)
• 1976/1977 — Ювэнтус (Турын, Італія)
• 1975/1976 — Лівэрпул (Ангельшчына)
• 1974/1975 — Барусія (Мёнхэнглядбах, Нямеччына)
• 1973/1974 — Фэеноорд (Ратэрдам, Нідэрланды)
• 1972/1973 — Лівэрпул (Ангельшчына)
• 1971/1972 — Тотэнгэм Готспур (Лёндан, Ангельшчына)

Вонкавыя спасылкі

Ліга Эўропы УЭФА — сховішча мультымэдыйных матэрыялаў

• Афіцыйная старонка УЭФА (анг.)