Беларуская грэка-каталіцкая парафія Ўваскрасеньня Хрыстовага (Антвэрпэн)

Беларуская грэка-каталіцкая парафія Сьвятога Мучаніка Язафата Полацкага і Ўваскрасеньня Хрыстовага ў Антвэрпэне — адзіная беларуская парафія ў Бэльгіі. Належыць да бізантыйска-каталіцкай традыцыі. Парафія знаходзіцца ў Антвэрпэне па адрасе Heilige-Hartkerk, Lange Beeldekensstraat 22. Месьціцца ў храме Сьвятога Сэрца Ісуса Хрыста. Пробашчам парафіі зьяўляецца сьвятар Ян Майсейчык.

У 2002 у адказ на рэальную патрэбу і просьбу вернікаў была заснаваная Супольнасьць у гонар Сьвятога Мучаніка Язафата Полацкага, якая і стала падмуркам будучай парафіі. 1 чэрвеня 2003 пры ўдзеле вялікае колькасьці беларусаў замежжа была адпраўлена першая Боская Літургія.

Набажэнствы (Божая Літургія) адпраўляюцца штонядзелі а 12.00 гадзіне дня на беларускай мове. Споведзь магчымая перад Набажэнствам альбо па-дамоўленасьці са сьвятаром у іншы час. Парафіяльны Фэст адзначаецца на Вялікдзень, а таксама на сьвята Сьвятога Мучаніка Язафата Полацкага 12 лістапада. Агульная колькасьць вернікаў складае каля 30 чалавек. Пры парафіі дзейнічаюць нядзельная школа й бібліятэка.

Вонкавыя спасылкі

• БГКЦ у Антвэрпэне