БАТЭ Барысаў

БАТЭ Барысаў
Поўная назва	Футбольны клюб «БАТЭ Барысаў»
Заснаваны	1973
Горад	Барысаў, Беларусь
Стадыён	Гарадзкі Умяшчальнасьць: 5402
Прэзыдэнт	Анатоль Капскі
Галоўны трэнэр	Віктар Ганчарэнка
Чэмпіянат	Вышэйшая ліга
· 2011	1 месца
Хатнія колеры Выязныя колеры
Галерэя здымкаў у Вікісховішчы Афіцыйны сайт

БАТЭ Барысаў — беларускі футбольны клюб з гораду Барысаў. Хатні стадыён — Барысаўскі гарадзкі стадыён. Каманда была заснаваная ў 1973 годзе, узноўленая ў 1996 годзе. Васьміразовы чэмпіён Беларусі, двухразовы ўладальнік Кубка Беларусі, двухразовы ўладальнік Супэркубка Беларусі. Першы беларускі клюб, які прайшоў у групавы этап Лігі чэмпіёнаў і Лігі Эўропы.

Гісторыя

Першыя крокі (1973—1981)

У год заснаваньня БАТЭ выступаў ва ўсходняй зоне другой групы (Д2) чэмпіянату БССР. Ужо першы сэзон склаўся для БАТЭ ўдала. Па яго выніках каманда дамаглася права на наступны год выступаць у чэмпіянаце рэспублікі.

У 1974 годзе БАТЭ дамогся першага посьпеху — стаў чэмпіёнам БССР, выйграўшы за сэзон 15 матчаў з 18 праведзеных. Аднак у наступным, 1975 годзе, БАТЭ прыйшлося здаволіцца толькі пятым месцам. Затое 1976 год стаў для БАТЭ сапраўды трыюмфальным: каманда аформіла своеасаблівы дубль, выйграўшы чэмпіянат і Кубак Беларускай ССР. У далейшым БАТЭ яшчэ раз станавіўся чэмпіёнам (1979), срэбным прызэрам (1978) чэмпіянату БССР і двойчы займаў чацьвертае месца (1977, 1981). У 1981 годзе каманда была расфармаваная.

Адраджэньне (1996—2007)

Чэмпіёнскі склад 1999 году

Новы этап у жыцьці БАТЭ пачаўся ў 1996 годзе. Ініцыятыўная група вырашыла адрадзіць каманду. Галоўным трэнэрам каманды быў прызначаны Юры Пунтус. У год свайго адраджэньня БАТЭ выступаў у другой лізе (Д3) чэмпіянату Беларусі і заняў у ёй першае месца, выйграўшы ў 24 матчах з 27. Нападнік Мікалай Рындзюк забіў 28 мячоў і стаў лепшым бамбардзірам турніру. На наступны год, выступаючы ў першай лізе, БАТЭ заняў другое месца і атрымаў права выступаць у элітным дывізіёне — Вышэйшай лізе чэмпіянату Беларусі.

У 1998, годзе свайго дэбюту на вышэйшым узроўні, БАТЭ заваёўвае срэбныя мэдалі. Наступны год стаў яшчэ больш удалым: БАТЭ ўпершыню становіцца чэмпіёнам Беларусі. 2000 год зноў стаў для БАТЭ «срэбным». Чэмпіянат 2001 году прынёс клюбу бронзавыя ўзнагароды.

Сэзон 2002 году стаў для БАТЭ неадназначным. Барысаўчане ўпершыню прабіліся ў фінал Кубка Беларусі, але зь лікам 0:2 саступілі ФК «Гомель». Удала склаўся сэзон на эўрапейскай арэне. Выступаючы ў Кубку Інтэртота, БАТЭ атрымаў пераканаўчую перамогу над прадстаўніком нямецкай Бундэслігі — «Мюнхэнам-1860», а затым практычна на роўных згуляў з італьянскай «Балёньняй». На фінішы чэмпіянату БАТЭ ў адчайным дужаньні дасягнуў лідыруючага ФК «Нёман» і ў «залатым» матчы чэмпіянату, дзякуючы галу Валера Тарасенкі ў дадатковы час, атрымаў перамогу зь лікам 1:0.

У чэмпіянаце 2003 году БАТЭ, нягледзячы на ўпэўненую гульню, да канца сэзону заставаўся на пятым месцы. У апошнім туры чэмпіянату яму мела сустракацца на выезьдзе зь менскім «Дынама». Гэтая сустрэча павінна была даць адказ на пытаньне, на якім месцы апынецца БАТЭ: другім або пятым. Але матч завяршыўся ўпэўненай перамогай БАТЭ 4:0, і каманда зноў заваявала срэбныя мэдалі.

У 2004 годзе БАТЭ, які няўдала выступіў у Кубку УЭФА, у фінале чэмпіянату ізноў прэтэндаваў на самыя высокія месцы, за тур да фінішу адстаючы ад менскага «Дынама» на два ачкі. І зноў апошняя сустрэча чэмпіянату мелася быць зь лідэрам на выезьдзе. Аднак гэтым разам леташняму трыюмфу не наканавана было паўтарыцца. Саступіўшы 0:2, БАТЭ заняў другое месца.

Сэзон 2005 году стаў самым цяжкім у гісторыі БАТЭ. Па-першае, у канцы папярэдняга сэзону каманду пакінуў яе нязьменны трэнэр Юры Пунтус, якога на трэнэрскім мастку БАТЭ зьмяніў Ігар Крывушэнка. Па-другое, у новы клюб Пунтуса перайшлі шэраг маладых гульцоў, на якіх у гэтым сэзоне ўскладаліся вялікія надзеі. БАТЭ саступіў у фінале Кубку МТЗ-РІПА, а па выніках чэмпіянату апынуўся на пятым месцы, упершыню ў найноўшай гісторыі застаўшыся без мэдалёў.

2006 год — асаблівы ў лёсе каманды. У гэты год адзначаўся дзесяцігадовы юбілей узнаўленьня клюбу. І БАТЭ годна адзначыў гэтую дату. Барысаўчане ўпершыню сталі ўладальнікамі Кубка Беларусі, у фінале ў дадатковы час зь лікам 3:1 перамогшы салігорскі «Шахцёр». А ў чэмпіянаце БАТЭ таксама фінішаваў першым, такім чынам зрабіўшы своеасаблівы дубль.

На матчы Лігі чэмпіёнаў супраць мадрыдзкага «Рэалу»

2007 год стаў асаблівым як у гісторыі БАТЭ, так і ўсяго беларускага футболу. У гэтым сэзоне БАТЭ дамогся нябачанага раней беларускімі клюбамі посьпеху — выйшаў у трэці кваліфікацыйны раўнд Лігі чэмпіёнаў УЭФА, выявіўшы пры гэтым велізарную волю да перамогі. Так, у першым кваліфікацыйным раўндзе БАТЭ прайграў у гасьцях кіпрскаму клюбу АПОЭЛ 0:2, аднак у хатнім матчы здолеў схіліць чару ваг двухраўндавага супрацьстаяньня ў сваю карысьць, абгуляўшы суперніка зь лікам 3:0. У другім крузе быў упэўнена перайграны ісьляндзкі «Габнарф’ёрдур» — 3:1 на выездзе, 1:1 у хатнім матчы. У трэцім раўндзе супернікам БАТЭ быў румынскі «Сьцяўа». Першы матч у Барысаве завяршыўся зь лікам 2:2, у другім матчы мацней былі румыны — 2:0. Выбыўшы з розыгрышу Лігі чэмпіёнаў, БАТЭ ў першым раўндзе Кубка УЭФА сустракаўся з гішпанскім «Вільлярэалам» — самым рэйтынгавым клюбам розыгрышу — і атрымаў дзьве паразы: 4:1 на выезьдзе і 2:0 на менскім стадыёне «Дынама». У чэмпіянаце Беларусі БАТЭ датэрмінова, за чатыры туры да фінішу, заваяваў чэмпіёнскі тытул. У розыгрышы Кубка БАТЭ зноў дайшоў да фіналу, дзе ў сэрыі пасьляматчавых пэнальці саступіў берасьцейскаму «Дынама».

Эпоха Віктара Ганчарэнка (2008—н.ч.)

6 жніўня 2008 году БАТЭ пад кіраўніцтвам новага, маладога, пэрспэктыўнага трэнэра Віктара Ганчарэнкі выбіў з 2-га кваліфікацыйнага раўнда Лігі Чэмпіёнаў бэльгійскі «Андэрлехт», адолеўшы яго па суме двух матчаў зь лікам 4:3, і прабіўся ў 3-і кваліфікацыйны раўнд.

На матчы ў ЛЧ супраць «Барсэлёны»

27 жніўня 2008 году, згуляўшы ўнічыю 1:1 зваротны матч у Барысаве з баўгарскім клюбам «Леўскі», БАТЭ ўпершыню трапіў у групавы этап Лігі Чэмпіёнаў, перамогшы ў першым матчы ў гасьцях 1:0. Ніколі яшчэ ў самы прэстыжны эўракубкавы турнір не трапляў так званы «футбольны карлік» зь пятага дзясятку клюбнага рэйтынг-ліста УЭФА. Зноў жа, ніколі дагэтуль да групавой стадыі на даходзіла каманда, якая пачынала шлях у найслабейшым з магчымых кошыкаў лёсаваньня. У групавой стадыі БАТЭ патрапіў у групу H разам з «Рэалам (Мадрыд)», «Ювэнтусам», «Зэнітам». У першай гульні на выезьдзе БАТЭ саступіў Рэалу зь лікам 0:2. У другой сваёй гульні зь «Ювэнтусам» (2:2) БАТЭ стаў першым беларускім футбольным клюбам, які набраў ачкі ў групавым этапе гэтага турніру. 21 кастрычніка, у трэцяй гульні на выезьдзе БАТЭ згуляў у нічыю (1:1) з «Зэнітам» з Санкт-Пецярбургу, а ў чацьвертай прайграў яму ў Менску зь лікам 0:2. У апошняй гульні групавога турніру БАТЭ згуляў унічыю зь «Ювэнтусам» 0:0, і ў выніку набраўшы 3 ачкі ў 6 гульнях, клюб заняў апошняе месца ў групе і скончыў свой выступ у эўракубках.

31 кастрычніка 2008 году БАТЭ стаў пяціразовым чэмпіёнам Беларусі. У гэты дзень быў згуляны перанесены матч 17-га туру, на ім падначаленыя Віктара Ганчаранкі перамаглі жодзінскае «Тарпэда» зь лікам 2:1 і за два туры да фінішу сталі недасягальныя для перасьледнікаў.

26 жніўня 2010 г. заваяваў права гуляць у групавым этапе Лігі Эўропы.Быў абыграны ісьляндзкі Габнарф’ёрдур (5:1 дома, 1:0 у гасцях), затым параза па суме 2 матчаў ад дацкага «Капэнгагена» (0:0 дома і 2:3 у гасцях) у Лізе чэмпіёнаў. Затым у кваліфікацыі Лігі Эўропы быў двойчы абыграны партугальскі «Марытыму» (3:0 дома і 2:1 у гасцях). Па выніках жараб'ёўкі супернікамі БАТЭ сталі нідэрляндзкі АЗ (перамога 4:1 дома, паражэньне 0:3 у гасьцях), Дынама Кіеў (2:2 у гасцях, паражэньне 1:4 дома), Шэрыф (перамога 1:0 у гасьцях; перамога 3:1 дома). Па выніках групавога турніру барысаўчане ўпершыню выйшлі ў 1/16 фіналу эўрапейскага кубка, дзе па суме двух сустрэч саступілі францускаму ПСЖ (2:2 дома і 0:0 на выезьдзе).

2 жніўня 2011 клюб атрымаў права гуляць у раўндзе плэй-оф чэмпіёнскай кваліфікацыі Лігі чэмпіёнаў, абыграўшы ў другім кваліфікацыйным раўндзе «Лінфілд» (1:1 у гасьцях, 2:0 дома), а ў трэцім — «Экранас» (0:0 у гасьцях, 3:1 дома). 24 жніўня БАТЭ абыграў аўстрыйскі «Штурм» у гасьцях 0:2 (1:1 дома) і другі раз у сваёй гісторыі выйшаў у групавы этап Лігі чэмпіёнаў, атрымаўшы, пры гэтым, месца ў трэцям кошыку. Па выніках жарабьёўкі БАТЭ адправіўся ў групу H разам з «Барсэлёнай», «Мілянам» і Вікторыяй.

Ліга чэмпіёнаў 2011/12 далася БАТЭ цяжка. У першым матчы БАТЭ саступіў «Барсэлёне» (0:5). У другім матчы саступіў «Міляну» (0:2). Трэці матч зь «Вікторыяй» быў згуляны зь лікам 1:1. Чацьверты матч у Барсэлёне быў прайграны зь лікам 4:0. Пяты матч быў, мабыць, найлепшым у гэтай Лізе чэмпіёнаў. БАТЭ згуляў унічыю зь «Мілянам» (1:1). Апошні, шосты матч, быў важны: у ім вырашаўся далейшы ўдзел у Лізе Эўропы. БАТЭ прайграў матч зь «Вікторыяй» і завяршыў ўдзел у турнірах.

Старт афіцыйных выступленьняў БАТЭ ў сэзоне 2012 пачаўся з паражэньня ад Гомеля ў Суперкубке Беларусі зь лікам 0:2. Пазьней, клуб атрымаў 11 перамог запар, але ў 13 туры саступіў Белшыне (0:1).

Перад пачаткам Эўракубкаў, БАТЭ сыграў некалькі матчаў няўдала. Да таго ж, у алімпійскую зборную былі прызваны Аляксандар Гутар, Дзяніс Палякоў, Дзьмітры Бага, Рэнан Брэсан, што аслабіла склад БАТЭ. Аднак, клюб ўзмацніўся Аляксандрам Глебам і Раманам Васілюком. У другім кваліфікацыйным раўндзе БАТЭ не без працы перамагае Вардар (3:2), аднак у наступным раўндзе ўпэўнена пермагае Дэбрэцэн (3:2). За выхад у групавы раунд Лігі чэмпіёнаў БАТЭ змагаецца з Гапаэль Кір’ят-Шмана. Першы матч скончыўся зь лікам 2:0 на карысьць каманды з Барысава.

Склад

Па стане на 23 сакавіка 2012 году

№ Пазыцыя Імя Год нараджэньня 2 ПА Зьміцер Ліхтаровіч 1978 4 ПА Сяргей Глябко 1992 5 Аб Аляксандар Юрэвіч 1979 7 Нап Арцём Канцавы 1983 8 ПА Аляксандар Валадзько 1986 9 Нап Майкон Каліжуры 1986 10 ПА Рэнан Брэсан 1988 11 ПА Завэн Бадаян 1989 13 Нап Зьміцер Мазалеўскі 1985 14 Аб Арцём Радзькоў 1985 15 ПА Аляксандар Глеб 1981 16 Бр Андрэй Шчарбакоў 1991 17 ПА Аляксандар Паўлаў 1984 18 Аб Максім Бардачоў 1986

№ Пазыцыя Імя Год нараджэньня 20 Нап Віталь Радзівонаў 1983 21 Аб Ягор Філіпенка 1988 22 Аб Марка Сіміч 1987 23 ПА Эдгар Аляхновіч 1987 24 Аб Яўген Кунцэвіч 1988 25 ПА Дзьмітры Бага 1990 27 ПА Вадзім Курловіч 1992 30 Бр Аляксандар Гутар 1989 32 ПА Міхаіл Сівакоў 1988 33 Аб Дзяніс Палякоў 1991 35 Бр Андрэй Гарбуноў 1983 77 ПА Філіп Рудзік 1987 78 Нап Раман Васілюк 1978 Аб Аляксей Сычкоў 1992

У арэндзе

№ Пазыцыя Імя Год нараджэньня 19 ПА Кірыл Алексіян («Берасьце», да канца сэзону 2012 году) 1991 ПА Алег Патоцкі («Дняпро», да 30 лістапада 2012 году) 1991 ПА Эдуард Чудноўскі («Белтрансгаз», да канца сэзону 2012 году) 1991

Трансфэры

Лета 2012

Пазіцыя	Гулец	Новы клюб
Нап	Аляксандар Глеб	Крылы Саветаў Самара
Нап	Раман Васілюк	Менск
Нап	Міхаіл Сівакоў*	Зюлтэ-Варэгэм

* У арэнду.
** Зь арэнды.

Вядомыя гульцы

• Аляксей Бага
• Генадзь Блізьнюк
• Аляксандар Глеб
• Аляксандар Ермаковіч
• Юры Жаўноў
• Матэя Кежман
• Аляксандар Кобец
• Сяргей Крывец
• Віталь Кутузаў
• Мікалай Рындзюк
• Міхаіл Сівакоў
• Аляксандар Федаровіч
• Васіль Хамутоўскі

Галоўныя трэнэры

• Юры Пунтус (1996—2004)
• Ігар Крывушэнка (2004 — 13 лістапада 2007)
• Віктар Ганчарэнка (13 лістапада 2007 — цяперашні час)

Вынікі выступаў

Чэмпіянат Беларусі

Сезон	Чэмпіянат, ліга	Месца	Г	В	Н	П	М	А		Кубак	Зацемкі
1996	Другая ліга	1	28	25	2	1	79-10	77		1/16
1997	Першая ліга	2	30	25	3	2	92-15	78		1/4
1998	Вышэйшая ліга	2 2	28	18	4	6	50-25	58		1/2
1999	Вышэйшая ліга	1 1	30	24	5	1	80-22	77		1/8
2000	Вышэйшая ліга	2 2	30	20	4	6	68-26	64		1/4
2001	Вышэйшая ліга	3 3	26	16	3	7	54-31	51		Ф 2
2002	Вышэйшая ліга	1 1	26	18	2	6	51-20	56		1/4
2003	Вышэйшая ліга	2 2	30	20	6	4	70-21	66		1/2
2004	Вышэйшая ліга	2 2	30	22	4	4	59-25	70		Ф 2
2005	Вышэйшая ліга	5	26	12	11	3	42-27	47		Ул 1
2006	Вышэйшая ліга	1 1	26	16	6	4	47-27	54		Ф 2
2007	Вышэйшая ліга	1 1	26	18	2	6	50-25	56		1/2
2008	Вышэйшая ліга	1 1	30	19	10	1	54-20	67		1/2
2009	Вышэйшая ліга	1 1	26	19	5	2	55-16	62		Ул 1
2010	Вышэйшая ліга	1 1	33	21	9	3	64-18	72		1/8
2011	Вышэйшая ліга	1 1	33	18	12	3	53-20	66		1/8

Эўракубкі

Асноўны артыкул: БАТЭ Барысаў у эўракубках

Кубак	Г	В	Н	П	М
Ліга чэмпіёнаў	49	19	17	13	58—54
Кубак УЭФА/Ліга Эўропы	36	13	4	19	47—63
Кубак Інтэртота	6	4	1	1	8—2
Усяго	91	36	22	33	113—119

Сэзон	Спаборніцтва	Раўнд		Супернік	Дома	У гасьцёх	Вынік
1999/00	Кубак УЭФА	к/р		Лякаматыў Масква	1:7	0:5	1:12
2000/01	Ліга чэмпіёнаў	1 к/р		Шырак Гюмры	2:1	1:1	3:2
		2 к/р		Гэльсынгборг	0:3	0:0	0:3
2001/02	Кубак УЭФА	к/р		Дынама Тбілісі	4:0	1:2	5:2
		1 раўнд		Мілян	0:2	0:4	0:6
2002	Кубак Інтэртота	1 раўнд		Акадэміск БК Капэнгаген	1:0	2:0	3:0
		2 раўнд		Мюнхэн-1860	4:0	1:0	5:0
		3 раўнд		Балёньня	0:0	0:2	0:2
2003/04	Ліга чэмпіёнаў	1 к/р		Багеміян Дублін	1:0	0:3	1:3
2004/05	Кубак УЭФА	1 к/р		Дынама Тбілісі	2:3	0:1	2:4
2005/06	Кубак УЭФА	1 к/р		Тарпэда Кутаісі	5:0	1:0	6:0
		2 к/р		Крылы Саветаў Самара	0:2	0:2	0:4
2006/07	Кубак УЭФА	1 к/р		Ністру Атач	2:0	1:0	3:0
		2 к/р		Рубін Казань	0:2	0:3	0:5
2007/08	Ліга чэмпіёнаў	1 к/р		АПОЭЛ Нікасія	3:0 (д. ч.)	0:2	3:2
		2 к/р		Габнарф’ёрдур	1:1	3:1	4:2
		3 к/р		Сьцяўа Бухарэст	2:2	0:2	2:4
2007/08	Кубак УЭФА	1 раўнд		Вільлярэал	0:2	1:4	1:6
2008/09	Ліга чэмпіёнаў	1 к/р		Валюр Рэйк’явік	2:0	1:0	3:0
		2 к/р		Андэрлехт Брусэль	2:2	2:1	4:3
		3 к/р		Леўскі Сафія	1:1	1:0	2:1
		Група H		Рэал Мадрыд	0:1	0:2
		Група H		Ювэнтус Турын	2:2	0:0
		Група H		Зэніт Санкт-Пецярбург	0:2	1:1
2009/10	Ліга чэмпіёнаў	2 к/р		Македонія Скоп’е	2:0	2:0	4:0
		3 к/р		Вэнтсьпілс	0:1	2:1	2:2
2009/10	Ліга Эўропы	Плэй-оф		Літэкс Ловеч	0:1	4:0 (д. ч.)	4:1
		Група I		Бэнфіка Лісабон	1:2	0:2
		Група I		Эвэртан Лівэрпул	1:2	1:0
		Група I		АЕК Атэны	2:1	2:2
2010/11	Ліга чэмпіёнаў	2 к/р		Габнарф’ёрдур	5:1	1:0	6:1
		3 к/р		Капэнгаген	0:0	2:3	2:3
2010/11	Ліга Эўропы	Плэй-оф		Марытыму Фуншал	3:0	2:1	5:1
		Група E		АЗ Алькмаар	4:1	0:3
		Група E		Дынама Кіеў	1:4	2:2
		Група E		Шэрыф Тыраспаль	3:1	1:0
		1/16		Пары Сэн-Жэрмэн	2:2	0:0	2:2
2011/12	Ліга чэмпіёнаў	2 к/р		Лінфілд	2:0	1:1	3:1
		3 к/р		Экранас	3:1	0:0	3:1
		Плэй-оф		Штурм	1:1	2:0	3:1
		Група H		Вікторыя Пльзень	0:1	1:1
		Група H		Барсэлёна	0:5	0:4
		Група H		Мілян	1:1	0:2
2012/13	Ліга чэмпіёнаў	2 к/р		Вардар	3:2	0:0	3:2
		3 к/р		Дэбрэцэн	1:1	2:0	3:1
		Плэй-оф		Гапаэль Кір’ят-Шмана	2:0	28 жніўня

Стадыён

Гарадзкі стадыён у 2006 годзе

Гульні клюб праводзіць на Барысаўскім гарадзкім стадыёне, пабудаваным у 1963 годзе. Тады была ўзведзена адна трыбуна — заходняя. Цяпер стадыён налічвае дзьве трыбуны, агульнай умяшчальнасцю 5402 чалавекі. Усталяваныя мачты штучнага сьвятла, ёсьць электратабло. У 2008 годзе над усходняй трыбунай быў пабудаваны казырок. Стадыён дапушчаны да правядзеньня міжнародных матчаў.

У 2010 году было распачата будаўніцтва новага стадыёну, умяшчальнасьцю каля 15 000 чалавек. Матчы групавых этапаў эўракубкаў БАТЭ праводзіць на менскім стадыёне «Дынама».

База

Асноўная трэніравальная база ФК БАТЭ разьмешчаная ў вёсцы Дудзінка.

Дзейнасьць

Бюджэт ФК БАТЭ ў 2008 годзе складаў больш за 5 млн даляраў ЗША. Тэхнічны фундатар у сэзоне 2008 году — страхавая кампанія «Белдзяржстрах».

Дасягненьні

• Чэмпіён Беларусі
  • Пераможца (8): 1999, 2002, 2006, 2007, 2008, 2009, 2010, 2011
  • Другое месца (4): 1998, 2000, 2003, 2004
  • Трэцяе месца (1): 2001

• Уладальнік Кубка Беларусі: 2006, 2010
• Фіналіст Кубка Беларусі: 2002, 2005, 2007

• Уладальнік Супэркубка Беларусі: 2010, 2011

• Чэмпіён БССР: 1974, 1976, 1979
• Срэбны прызэр чэмпіянату БССР: 1978
• Уладальнік Кубка Беларускай ССР: 1976

Вонкавыя спасылкі

БАТЭ Барысаў — сховішча мультымэдыйных матэрыялаў

• Афіцыйная старонка (рас.)