Міндаўгас Сінкявічус
| Міндаўгас Сінкявічус | |
| па-летувіску: Mindaugas Sinkevičius | |
 | |
| Прэм’ер-міністар Летувы | |
|---|---|
| 14 чэрвеня 2026 году — цяперашні час | |
| Прэзыдэнт | Гітанас Наўседа |
| Папярэднік | Інга Ругінене |
| мэр Янаўскага раённага самаўраду | |
| 11 красавіка 2019 году — 20 верасьня 2024 году | |
| Папярэднік | Яўген Сабуціс |
| Наступнік | Рымантас Сінкявічус |
| Міністар эканомікі Летувы | |
| 13 сьнежня 2016 году — 13 кастрычніка 2017 году | |
| Папярэднік | Браніславас Ліюткус |
| Наступнік | Віргініюс Сінкявічус |
| Асабістыя зьвесткі | |
| Нарадзіўся | 20 чэрвеня 1984 Янава |
| Партыя | Летувіская Сацыял-Дэмакратычная партыя |
| Адукацыя | |
| Сужэнец | Айсьце Сінкявічус |
| Бацька | Rimantas Sinkevičius[d] |
| Сайт | sinkevicius.lt (лет.) |
Міндаўгас Сінкявічус (па-летувіску: Mindaugas Sinkevicius; 20 чэрвеня 1984 году) — летувіскі палітык, які з 14 ліпеня 2026 году займае пасаду 20-га прэм’ер-міністра Летувы. Ён таксама быў мэрам Янаўскага раённага самаўраду (2011–2016 і 2019–2024), былым міністрам эканомікі Летувы (2016–2017) і віцэ-мэрам Янава (2008–2011).
Біяграфія
[рэдагаваць | рэдагаваць код]Сінкявічус скончыў Ёнаўскую гімназію «Сэнаместыс» у 2003 годзе. Ён скончыў Віленскі ўнівэрсытэт, Унівэрсытэт Міколаса Рамэрыса і Ўнівэрсытэт мэнэджмэнту і эканомікі ISM, абараніўшы 11 верасьня 2015 году ў ISM сваю доктарскую дысэртацыю «Спажываньне алькаголю ў кантэксьце супярэчлівых грамадзкіх і асабістых чыньнікаў».
Сінкявічус быў актыўны ў грамадзкай дзейнасьці і публічных арганізацыях. Сябра Сацыял-дэмакратычнай партыі Летувы, ён быў абраны ў раду Янаўскага раённага самаўраду ў 2007 годзе. У 2008 годзе ён стаў віцэ-прэзыдэнтам Літоўскай рады моладзі (LiJOT). У красавіку 2011 году, ва ўзросьце 26 гадоў, рада абрала яго мэрам Янаўскага раённага самаўраду. У 2015 годзе Сінкявічус быў пераабраны мэрам на першых прамых выбарах мэраў, атрымаўшы 71,2% галасоў.
У канцы 2016 году ён быў прызначаны міністрам эканомікі ў кабінэце Саўлюса Сквярняліса — 17-м кабінэце Летувы.
У 2017 годзе ён сышоў з пасады ў Міністэрстве эканомікі.
Зь сьнежня 2017 году да красавіка 2019 году ён быў дырэктарам закрытага акцыянэрнага таварыства «Jonavos vandenys».
У 2019 годзе Сінкявічус быў пераабраны мэрам Янава, атрымаўшы 57,36 % галасоў.
У траўні 2024 году суд у Коўне прызнаў Сінкявічуса вінаватым у злоўжываньні службовым становішчам, фальсыфікацыі дакумэнтаў і прысваеньні маёмасьці ў справе, зьвязанай са шкодай Янаўскаму раённаму самаўраду ў памеры 1 487 эўра і выкарыстаньнем публічных сродкаў для аплаты тэлефонных рахункаў ягонай жонкі і іншых асабістых выдаткаў. Яго прысудзілі да штрафу ў памеры 12 500 эўра, а таксама забаранілі займаць публічныя пасады цягам трох гадоў. Пасьля гэтага Сінкявічус абскардзіў прысуд. 19 верасьня Апэляцыйны суд Летувы адхіліў ягоную скаргу. У выніку мандат Сінкявічуса як мэра быў спынены. 5 сакавіка 2025 году Міндаўгас Сінкявічус быў апраўданы канчатковым рашэньнем Вярхоўнага суду. Суд пастанавіў, што дзеяньні Сінкявічуса ня могуць цягнуць за сабою крымінальнай адказнасьці, таму справа супраць яго была спыненая, а папярэднія прысуды судоў ніжэйшых інстанцыяў — скасаваныя.
Пасьля адстаўкі Гінтаўтаса Палуцкаса з пасады старшыні Сацыял-дэмакратычнай партыі ў ліпені 2025 году Сінкявічус быў прызначаны часовым кіраўніком, а пазьней, увесну, быў абраны на гэтую пасаду. Прэзыдэнт Гітанас Наўседа вылучыў яго на пасаду прэм’ер-міністра Летувы ў чэрвені 2026 году, пасьля адстаўкі Інгі Ругінене. Ягонае прызначэньне было ўхвалена Соймам галасаваньнем 80 супраць 2. Кабінэт Сінкявічуса склаў прысягу 14 ліпеня ў кааліцыі зь Зьвязам дэмакратаў «За Летуву» і Летувіскім зьвязам сялянаў, зялёных і хрысьціянскіх сем’яў.
Сям’я
[рэдагаваць | рэдагаваць код]Міндаўгас Сінкявічус — сын Рымантаса Сінкявічуса, дэпутата Сойму і міністра транспарту ў папярэднім кабінэце Буткявічуса. Ягоная маці Лігіта — галоўная спэцыялістка Агенцтва аховы навакольнага асяродзьдзя пры Міністэрстве навакольнага асяродзьдзя. Ягоная сястра Рута — памочніца судзьдзі Віленскага акруговага суду.
Міндаўгас Сінкявічус жанаты (з траўня 2017 году). Ягоная жонка — Айсьце Сінкявічус, дызайнэрка інтэр’ераў з Коўна.
Вонкавыя спасылкі
[рэдагаваць | рэдагаваць код]
Міндаўгас Сінкявічус — сховішча мультымэдыйных матэрыялаў