Мікаэль Кінгсбэры

	Мікаэль Кінгсбэры
Пэрсанальная інфармацыя
Нарадзіўся	24 ліпеня 1992 (33 гады); Сэнт-Агат-дэ-Мон[d];
Грамадзянства	Канада;
Прафэсійная інфармацыя
Спэцыялізацыя	фрыстайліст

Мікаэ́ль Кі́нгсбэры (па-ангельску: Mikaël Kingsbury; 24 ліпеня 1992 году) — канадзкі фрыстайліст, які спэцыялізуецца на могуле. Алімпійскі чэмпіён 2018 году, срэбны прызэр Алімпійскіх гульняў 2014 і 2022 гадоў, шматразовы чэмпіён сьвету і ўладальнік Кубка сьвету па фрыстайле ў агульным заліку і могуле. За кар’еру выходзіў на старты этапаў Кубка сьвету больш за 100 разоў.

Кар’ера

Дэбютаваў у спаборніцтвах Кубка сьвету 8 студзеня 2010 году ў веку 17 гадоў на этапе ў Калгары, дзе заняў сьціплае 36-е месца. Менш чым праз год, у сьнежні, канадзец упершыню трапіў на кубкавы подыюм, стаўшы другім на этапе ў Куўсама. А яшчэ праз 10 дзён, у кітайскім Бэйда-Лэйк Кінгсбэры атрымаў сваю першую перамогу ў могуле. У тым жа сэзоне дэбютаваў на чэмпіянаце сьвету. На тых спаборніцтвах канадац разжыўся бронзай. У паралельным могуле Кінгсбэры зноў апынуўся за сьпіною Аляксандра Білядо, але гэтым разам спыніўся на другой пазыцыі.

У сэзоне 2011—2012 гадоў канадзец атрымаў 8 перамог у могуле і паралельным могуле, зь якіх шэсьць былі здабытыя запар, і выйграў як залік могула, гэтак і генэральную клясыфікацыю, стаўшы ўладальнікам Кубка сьвету ў веку 19-ці гадоў. Свой посьпех спартовец паўтарыў у наступным годзе, а агулам спартовец дамінаваў у Кубку сьвету ажно дзевяць гадоў запар, кожны год робячыся ўладальнікам крышталёвага глёбуса агульнага заліку і пераможцам клясыфікацыі магулістаў. На зімовых Алімпійскіх гульнях 2018 году стаў чэмпіёнам па могуле. У лютым 2019 году на чэмпіянаце сьвету ў Парк-Сіці ўпершыню ў кар’еры адразу перамог у могуле і паралельным могуле.

Перад пачаткам сэзону 2020—2021 гадоў у час трэнаваньняў у фінскай Руцы атрымаў траўму сьпіны, празь якую вымушаны прапусьціць 4—6 тыдняў^[2]. 4 і 5 лютага 2021 году, вярнуўшыся па адужані, выйграў могул і паралельны могул на этапе Кубка сьвету. Празь месяц у Алматы фрыстайліст стаў пяціразовым чэмпіёнам сьвету, стаў найлепшым у спаборніцтвах па могуле. На наступны дзень ён здабыў залаты мэдаль і ў паралельным могуле, на другім чэмпіянаце сьвету запар учыніўшы залаты дубль. На зімовых Алімпійскіх гульнях 2022 году ў Пэкіне ў першы дзень спаборніцтваў узяў срэбны мэдаль у могуле, нечакана саступіўшы швэду Вальтэру Вальбэргу^[3]. З тых часоў перастаў перамагаць у агульным заліку Кубка сьвету, але рабіўся найлепшым у заліку магулістаў. Чэмпіянат сьвету 2023 году ў Бакурыяні стаў трэцім запар, на якім Кінгсбэры выйграў абедзьве магульныя дысцыпліны, але праз два гады здолеў пацьвердзіць статус найлепшага толькі ў паралельнім могуле, а ў іншай дысцыпліне стаў срэбным мэдалістам.

Крыніцы

↑ Mikaël Kingsbury // Roglo — 1997.
↑ Canadian moguls star Mikael Kingsbury out four to six weeks with back injury Архіўная копія ад 03.12.2020 г.
↑ Шведский фристайлист Вальберг завоевал золото в могуле на Олимпийских играх в Пекине. sport-express.ru (05.02.2022). Архіўная копія ад 05.02.2022 г.

Вонкавыя спасылкі

Профіль (анг.) на FIS

[_d7e27acf3bfb2cd6-1] Mikaël Kingsbury // Roglo — 1997.

[2] Canadian moguls star Mikael Kingsbury out four to six weeks with back injury Архіўная копія ад 03.12.2020 г.

[3] Шведский фристайлист Вальберг завоевал золото в могуле на Олимпийских играх в Пекине. sport-express.ru (05.02.2022). Архіўная копія ад 05.02.2022 г.

[1]

[2]

[3]