Мэдаль за здушэньне польскага мецяжу
| Мэдаль «За здушэньне польскага мецяжу» | |||
| |||
| Арыгінальная назва | Медаль «За усмирение польского мятежа» | ||
|---|---|---|---|
| Краіна |
 Расейская імпэрыя | ||
| Тып | мэдаль | ||
| Статус | не ўручаецца | ||
| Статыстыка | |||
| Парамэтры | дыямэтар 28 мм | ||
| Дата заснаваньня | 13 студзеня 1865 | ||
| Колькасьць | ~ 600 тыс. | ||
Мэдаль «за здушэньне польскага мецяжу» (па-расейску: Медаль «За усмирение польского мятежа») — узнагарода Расейскае імпэрыі, якою адзначалі ўдзельнікаў здушэньня Студзеньскага паўстаньня.
Мінуўшчына[рэдагаваць | рэдагаваць крыніцу]
Узнагарода была ўведзеная загадам імпэратара Аляксандра II 13 студзеня [ст. ст. 1 студзеня] 1865 для адзначэньня ўдзельнікаў бітваў супраць паўстанцаў 1863—1864 рокаў.
Мэдаль меў адну ступень, але два варыянты, якія адрозьніваліся колерам: сьветла- ці цёмна-бронзавым, якімі ўзнагароджваліся розныя групы ўдзельнікаў.
Падставы ўзнагароджваньня[рэдагаваць | рэдагаваць крыніцу]
Узнагароды сьвятлейшага колеру атрымалі вайскоўцы ўсіх званьняў ад генэралаў да шарагоўцаў; жаўнеры пагранічнай варты; маларасейскіх казацкіх палкоў Чарнігаўскай і Палтаўскай губэрняў; коннай сотні міліцыі Дзьвінскага і Рэжыцкага паветаў; мэдыкі, вайсковыя сьвятары, якія ў 1863—1864 бралі ўдзел у бітвах з паўстанцамі або знаходзіліся ў войсках. Мэдаль уручаўся таксама адстаўным ніжнім чынам і асобам усіх саслоўяў, у тым ліку й сялянам, якія змагаліся са зброяй у руках. Паводле загаду 29 студзеня 1877 яго таксама ўручылі ўсім вайскоўцам марскога ведамства, якія ў пэрыяд паўстаньня знаходзіліся на суднах ля берагоў Курляндыі.
Цёмна-бронзавыя мэдалі атрымлівалі цывільныя і вайсковыя ўраднікі, якія ў 1863—1864 служылі на тэрыторыі Царства Польскага і Заходняга краю і ня бралі непасрэднага ўдзелу ў бітвах, аднак сваімі дзеяньнямі дапамагалі здушэньню паўстаньня. Уручаўся гэты мэдаль таксама іншым жыхарам, якія супрацоўнічалі з расейскай адміністрацыяй і войскам.
Агулам было выбіта 368 133 штукі мэдалёў сьветла-бронзавага і 231 221 штука цёмна-бронзавага колераў.
Апісаньне[рэдагаваць | рэдагаваць крыніцу]
Мэдаль акруглы, дыямэтрам 28 мм, выкананы са сьветлай і цёмнай бронзы.
На авэрсе знаходзіцца герб Расеі — дзьвюхгаловы чорны арол, укаранаваны царскаю каронай, які трымае ў капцюрах скіпэтар і дзяржаву. На грудзёх арла герб Маскоўскага княства — шчыт з выявай сьвятога Юрыя, які перамагае цмока.
На рэвэрсе ў цэнтральнай частцы знаходзіцца дата 1863—1864, а ўздоўж рабра надпіс «За здушэньне польскага мецяжу» (рас. За усмирение польскаго мятежа). Між пачаткам і канцом надпісу зьмешчаная маленькая чатырохпялёсткавая разэтка.
Мэдаль выдаваўся на стужцы колераў дзяржаўнага сьцягу (Раманаўскай стужцы) — бела-аранжава-чорнай для нашэньня на грудзёх.
Глядзіце таксама[рэдагаваць | рэдагаваць крыніцу]
Крыніцы і заўвагі[рэдагаваць | рэдагаваць крыніцу]
Літаратура[рэдагаваць | рэдагаваць крыніцу]
- Изотова М. А. Ордена и медали России и СССР. — М.: Владис, 2010. — С. 265—267. — ISBN 978-5-9567-0960-3
- Александр Кузнецов, Николай Чепурнов. Наградная медаль. — М.: Патриот, 1995. — ISBN 5-7030-0452-7
Вонкавыя спасылкі[рэдагаваць | рэдагаваць крыніцу]
- Апісаньне мэдалю(рас.)