Менскі малочны завод № 1

«Менскі малочны завод № 1»
Тып	адкрытае акцыйнае таварыства
Заснаваная	29 сьнежня 1929 (95 гадоў таму)
Уласьнікі	Менскі абласны выканаўчы камітэт (90%)
Краіна	Беларусь
Разьмяшчэньне	Менск
Адрас	Партызанскі раён, прамвузел Дражня, вул. Солтыса, д. 185
Ключавыя фігуры	Тамара Чычыра (генэральны дырэктар), Сяргей Сакалоўскі (галоўны інжынэр)
Галіна	харчовая прамысловасьць
Прадукцыя	малако, кефір, вяршкі, тварог, ёгурт, пудынг, сыр, масла, малочны кактэйль
Абарачэньне	▲724,68 млн рублёў (2023 год; 228,066 млн $)
Апэрацыйны прыбытак	▲1,059 млн рублёў (2023 год; 333 тыс. $)
Чысты прыбытак	▲532 тыс. рублёў (2023 год; 167 тыс. $)
Даччыныя кампаніі	«Маладэчанскі малочны камбінат», «Малочны гасьцінец»
Аўдытар	«ФБК-Бел»
belmilk.by/by

«Менскі малочны завод № 1» — дзяржаўнае харчовае прадпрыемства Беларусі, заснаванае ў сьнежні 1929 году.

На 2025 год штодня перапрацоўваў звыш 900 тонаў малака ў больш як 250 найменьняў вырабаў. Выпускаў кефір, тварог, сьмятану і масла, а таксама такія малочныя ласункі, як ёгурты, жэле, пудынгі і пасты. Цэх дзіцячых малочных вырабаў выпускаў малако і кефір для немаўлятаў з 8 месяцаў, а таксама ёгурты для малечаў дашкольнага веку і дзяцей школьнага веку. «Менскі малочны завод № 1» быў першым у Беларусі вытворцам глязураваных сыркоў, сыру фэта і 3 відаў тварожных ласункаў пад таварным знакам «Венскі сьняданак». Пастаўляў за мяжу 40 % вырабаў, найбольш у Расею, Грузію, Таджыкістан, Азэрбайджан і Ўзбэкістан. Выпускаў малочныя вырабы пад яшчэ 6 таварнымі знакамі: «Менская марка», «Славянскія традыцыі», «Малочная краіна», «Дэпі», «Арыстэй» і «Ёгуру». Месьціўся ў Партызанскім раёне Менску па вуліцы Солтыса, дом 185. Пры гэтым прадпрыемства стаяла на дзяржаўным уліку ў Заслаўі (Менскі раён) па Вакзальнай вуліцы, дом 11. Уласны аўтапарк налічваў звыш 100 самаходаў, зь іх 64 цяжкавікі.

Будова

На 2025 год «Менскі малочны завод № 1» меў у складзе «Першага малочнага» холдынгу:

• «Маладэчанскі малочны камбінат» (Нагорная вуліца, дом 7; засн. 1945). За зьмену перапрацоўваў 755 тонаў малака ў звыш 80 найменьняў вырабаў пад таварным знакам «Маладзея», у тым ліку ў 160 т натуральнамалочных вырабаў, 15 т сухога малака, 10 т паўцьвёрдых і цьвёрдых сыроў, 10 т масла, 2 т мяккіх сыроў і 600 кг казэіну. Сярод іншага, выпускаў блакітны сыр «Ракфорці» паводле распрацоўкі «Інстытуту мяса-малочнай прамысловасьці», а таксама мацарэлу.
• «Валожынскі масласырзавод» (вул. Пушкіна, д. 60; засн. 1939). Выпускаў да 2400 тонаў цьвёрдых сыроў за год.
• «Вялейскі гармалзавод» (Партызанская вуліца, дом 77; засн. 1949). Вырабляў масла, тварог, ёгурты і казэін.
• «Кабыльніцкі масласырзавод» (Завадзкая вуліца, дом 1; засн. 1952) у Мядзельcкім раёне. Выпускаў блакітны сыр Ракфор, тварог і стэрылізаванае малако пад таварным знакам «Нарачанскія пачастункі».
• «Малочны гасьцінец» (Менск, Партызанскі праспэкт, дом 170; засн. 1965 як гармалзавод № 2). Вырабляў паўцьвёрдыя і плаўленыя сыры, тварог і масла. Меў магутнасьць на 300 тонаў малака за содні.
• «Новыя Зелянкі» (Ігуменскі раён; засн. 1921). Мела рабатызаваную фэрму на 480 галоваў буйной рагатай жывёлы і малочна-таварную фэрму (МТФ) на 720 галоваў, цэх раздою і фэрму адкорму.
• «Дрычын» (Пухавіцкі раён). Мела цэх раздою на 2019 галоваў, МТФ на 435 галоваў, фэрму вырошчваньня на 738 цёлак і фэрму адкорму на 300 быкоў.
• «Новая Любаньня» (Вялейскі раён). Налічвала 6 малочна-таварных фэрмаў.

Сярод іншага, «Менскі малочны завод № 1» меў уласную гандлёвую сетку з 4 фірмовых крамаў у Вялейцы, Маладэчне, Мядзелі і Менску, а таксама 3 гандлёвыя месцы на рынках Вялейкі і Маладэчна ды на Камароўскім рынку Менску. За мяжой дзейнічала гандлёвае прадстаўніцтва ў Санкт-Пецярбургу, якое прадавала малочныя вырабы ў 56 з 89 рэгіёнаў Расеі.

Вырабы

На 2025 год «Менскі малочны завод № 1» выпускаў:

• 8 найменьняў дзіцячых малочных вырабаў пад таварным знакам «Дэпі» — кефір тлустасьцю 3,2 % у пакунку на 250 грамаў з тэрмінам захоўваньня 10 дзён, стэрылізаванае малако, у тым ліку безьляктознае, у пакунках па 200 і 250 мілілітраў з тэрмінам захоўваньня 90 дзён, малочныя кактэйлі у пакунках па 200 мл з тэрмінам захоўваньня 15 дзён;
• 30 найменьняў малака пад таварнымі знакамі «Менская марка» і «Славянскія традыцыі» — пастэрызаванае, стэрылізаванае і топленае малако, у тым ліку з даданьненем вітамінаў і кальцу, тлустасьцю 1,6 і 2,5, 2,6 і 2,8, 3,2, 3,3 і 3,4 % у кардонных пакунках, поліэтыленавай плёнцы і плястыкавых пляшках па 0,25, 0,5, 0,9, 1 і 1,5 літры з тэрмінам захоўваньня 9 і 10, 15, 20 і 360 дзён, а таксама аўсяны і какосавы напоі;
• 20 найменьняў кісламалочных вырабаў — кефір, у тым ліку ўзбагачаны біфідабактэрыямі, тлустасьцю 1,5 і 2,5, 2,8 і 3,2 % у кардонных пакунках, плёнцы і пляшках па 0,5, 0,9 і 1 літры з тэрмінам захоўваньня 10 і 20 дзён, масьлянку, у тым ліку зь біфідабактэрыямі і садавіннымі напаўняльнікамі, тлустасьцю 0,7 і 1,5 % у кардонках і плёнцы па 0,5 і 1 літры, сыраквашу тлустасьцю 4 % у плястыкавых кубках па 380 грамаў і пражанку тлустасьцю 2,5 % у кубку і кардонцы па 380 і 500 грамаў з тэрмінам захоўваньня 14 дзён;
• 18 найменьняў вяршкоў і сьмятаны — вяршкі, у тым ліку стэрылізаваныя, тлустасьцю 10 і 33 % у кардонках па 0,2, 0,5 і 1 літры з тэрмінам захоўваньня 10 і 180 дзён, сьмятану, у тым ліку безьляктозную, тлустасьцю 15 і 18, 20, 25 і 26 % у кубках, плёнцы і вагавую па 180, 380, 400 г і 5 кг;
• 18 найменьняў тварагу — тлустасьцю 0 і 2, 4, 5 і 9 %, у тым ліку вагавы і рассыпісты, безьляктозны і мяккі тварог, у мэталізаванай і поліэтыленавай плёнцы, вакуўмным пакунку, плястыкавых вёдрах і кардонных скрынях па 150 і 180, 350 і 375 г з тэрмінам захоўваньня 15 і 30 дзён;
• 7 найменьняў зярнёнага тварагу — тлустасьцю 5 %, у тым ліку зь ягадным напаўняльнікам бяз цукру і вяршкамі, у плястыкавых кантэйнэрах і вядзерцах па 140, 400 і 800 г пры тэрміне захоўваньня 7 і 9 дзён;
• 14 найменьняў тварожных вырабаў — тварожныя ласункі тлустасьцю 4 і 7 % з садавіннымі напаўняльнікамі ў плястыкавых кубках і вакуўмных пакунках па 150 і 400 г, тварожную пасту і тварожныя сыркі тлустасьцю 8,5 % у пакунку на 100 г пры тэрміне прыдатнасьці 10 дзён;
• 26 найменьняў глязураваных сыркоў — тлустасьцю 5 і 18, 20, 23 і 26 % з напаўняльнікамі, у тым ліку бяз цукру, у лямінаванай плёнцы па 38 і 40, 45 і 50 г пры тэрміне захоўваньня 20 і 30 дзён;
• 16 найменьняў ёгуртаў — тлустасьцю 1,5 і 2,5 %, узбагачаных біфідабактэрыямі, бяз цукру і з садавінным напаўняльнікамі, у тым ліку пітныя, у плястыкавых кубках і кілішках і кардонных пакунках па 125, 310 і 500 г пры тэрміне захоўваньня 30 дзён;
• 10 найменьняў жэле і пудынгаў — жэле з малочнай сыроваткі і сьмятаннае з напаўняльнікамі тлустасьцю 12 і 15 % у плястыкавых келіхах па 140 і 150 г пры тэрміне захоўваньня 25 дзён, ванільны і шакалядны пудынгі тлустасьцю 7 % у пакунках па 160 г;
• 15 найменьняў мяккіх, рассольных і плаўленых сыроў — мяккія сыры фэта тлустасьцю 45 % у плястыкавых кантэйнэрах па 250 г пры тэрміне прыдатнасьці 60 дзён, вяршковыя сыры тлустасьцю 70 % у кантэйнэрах па 120 г пры тэрміне захоўваньня 90 дзён, мацарэлу тлустасьцю 45 %, плаўленыя сыры тлустасьцю 45 % у плястыкавых келіхах па 100 г пры тэрміне захоўваньня 30 дзён, рассольны сыр брынзу тлустасьцю 45 % у кантэйнэрах па 250 г пры тэрміне прыдатнасьці 60 дзён і тварожныя сыры тлустасьцю 65 %;
• 31 найменьне цьвёрдых сыроў — тлустасьцю 45 і 50 %, у тым ліку альпійскі і гаўду, тыльзыцкі, чэдэр і эдам, а таксама сыры зь лісічкамі, чарамшой і труфэлямі;
• 13 найменьняў блакітных сыроў — тлустасьцю 45 і 55 %, у тым ліку пармэзан, ракфорці і камамбэр;
• 8 найменьняў масла — тлустасьцю 69, 72,5 і 82,5 %, у тым ліку салёнае, салодкае і безьляктознае, у пакунках па 180 г і вагавае ў скрынях па 20 кг;
• сухое малако тлустасьцю 1,5 % і сухую дэмінэралізаваную сыроватку;
• 2 найменьні малочных кактэйляў тлустасьцю 2 % у кардонных пакунках.

Мінуўшчына

29 сьнежня 1929 году «Менскі малочны завод № 1» па вуліцы Фабрыцыюса, дом 9 выпусьціў першую малочную сыроватку, кефір і малако. На 1940 год завод быў найбольшым прадпрыемствам малочнай прамысловасьці Беларускай ССР. У 1953 годзе ўзьвялі новыя вытворчыя карпусы з новым абсталяваньнем, у выніку чаго магутнасьць перапрацоўкі павялічылася да 75 тонаў малака за содні. У 1974 годзе завод пераабсталявалі, таму яго магутнасьць вырасла да 230 тонаў цэльнамалочных вырабаў за содні. У 1975 годзе ўпершыню ў Беларусі пачалі выпускаць глязураваныя сыркі.

У 1994 годзе «Менскі малочны завод № 1» перамясьцілі на вытворчую пляцоўцу плошчай 10 га па вуліцы Солтыса ў Партызанскі раёне (прамвузел «Дражня»), дзе магутнасьць перапрацоўкі склала 320 тонаў малака за содні. 2 сьнежня 1996 году Менскі абласны выканаўчы камітэт ухваліў Рашэньне № 90 аб перадачы прадпрыемства ў склад дзяржаўнага аб'яднаньня «Мясамалако». 7 красавіка 1997 году завод пераўтварылі ў адкрытае акцыйнае таварыства «Млітэпс». 16 кастрычніка 2002 году Менскія абласны і гарадзкі выканкамы зацьвердзілі Рашэньне № 721/1544 аб вяртаньні заводу ў камунальную ўласнасьць Менску пад кіраваньне прадпрыемства «Менскгархарчпрам». 19 лютага 2004 году прадпрыемства перайменавалі ў «Гарадзкі малочны завод № 1». 2 верасьня 2008 году завод пераўтварылі ў камунальнае ўнітарнае прадпрыемства, да якога далучылі «Гарадзкі малочны завод № 3» побач. У 2009 годзе пачалі вытворчасьць тварожных вырабаў і мяккага сыру пад таварным знакам «Венскі сьняданак», а таксама сыру фэта. У 2010 годзе наладзілі выпуск ёгуртаў у сэкцыйнай упакоўцы. У 2012 годзе перабудавалі цэх дзіцячага харчаваньня да магутнасьці на 40 тонаў. 5 сьнежня 2012 году прадпрыемства пераўтварылі ў ААТ «Менскі малочны завод № 1». У 2014 годзе запусьцілі лінію згушчэньня тварожнай сыроваткі магутнасьцю 400 тонаў за содні.

У верасьні 2014 году да «Менскага малочнага заводу № 1» далучылі «Гарадзкі малочны завод № 2» на Партызанскім праспэкце, дом 170 у якасьці падразьдзяленьня «Малочны гасьцінец» (Заводзкі раён). 23 студзеня 2015 году Савет міністраў Беларусі ўхваліў Пастанову № 39 аб набыцьці «Малочнага гасьцінца», які 1 сакавіка 2015 году пераўтварылі ў рэспубліканскае ўнітарнае прадпрыемства. У 2015 годзе запусьцілі лінію сьмятаны пад таварнымі знакамі «Славянскія традыцыі» і «Менская марка». У 2016 годзе выпусьцілі тварог са стрыжнёвымі напаўняльнікамі зь вішняй і малінамі. У 2017 годзе ўпершыню выпусьцілі малако і кефір у пляшках з поліэтылентэрэфталяту (ПЭТ). У 2018 годзе запусьцілі вытворчасьць ёгуртаў «Арыстэй». У 2019 годзе ў Таджыкістане стварылі сумеснае прадпрыемства «Ватан». 7 лістапада 2020 году адчынілі сваю першую краму самаабслугоўваньня ў гандлёвым цэнтры «Валяр’янава» (Менскі раён). У 2020 годзе прадпрыемства было адзіным у Беларусі вытворцам блакітнага сыру і сыру для смажаньня.

1 красавіка 2022 году да «Менскага малочнага заводу № 1» далучылі ААТ «Маладэчанскі малочны камбінат», які ўлучаў тры падразьдзяленьні: «Валожынскі масласырзавод», «Вялейскі гармалзавод» і «Кабыльніцкі масласырзавод» (Мядзельскі раён). У 2022 годзе ўпершыню ў Беларусі выпусьцілі глязураваныя сыркі бяз цукру. У Ленінградзкай вобласьці Расеі адчынілі першую замежную краму прадпрыемства. На 2024 год усе падразьдзяленьні «Менскага малочнага заводу № 1» штодня перапрацоўвалі 1500 тонаў малака, 65 % якога прыпадала на гатунак «Экстра». 4 чэрвеня 2024 году «Малочны гасьцінец» вярнулі ў склад «Менскага малочнага заводу № 1» у якасьці вытворчага ўчастку. У лістападзе 2024 году на выставе «Харчэкспа» прадставілі сыр чэдэр і расольны сыр імэрулі для вытворчасьці харапуры ў Грузіі. 20 студзеня 2025 году ў Сусьветны дзень аматараў сыру «Першы малочны» холдынг прадставіў у Вялейцы вытворчасьць сыру камамбэр. 22 студзеня 2025 году ў Кабыльніку Мядзельскага раёну адчынілі вытворчасьць блакітных сыроў «Ракфорці», «Тампліер», «Бэржэр» і «Гаргандзола». На яе ўзьвядзеньне пайшло 16,4 млн рублёў, што забясьпечыла яшчэ 20 працоўных месцаў і рост вытворчасьці блакітных сыроў на 30 тонаў да 90 тонаў за месяц.

Вонкавыя спасылкі

• Электронныя звароты // ААТ «Менскі малочны завод № 1», 2025 г. Праверана 31 студзеня 2025 г.
  • Навіны (рас.)
• «Менскі малочны завод № 1» // Беларускі экскурсійны партал, 2025 г. Праверана 31 студзеня 2025 г.