Лянус (футбольны клюб)

	Лянус
Поўная назва	Club Atlético Lanús
Заснаваны	3 студзеня 1915
Горад	Лянус, Аргентына
Стадыён	Гарадзкі; Умяшчальнасьць: 47 027
Чэмпіянат	Прафэсійная футбольная ліга
· 2025	8 месца
	Галерэя здымкаў у Вікісховішчы; clublanus.com (гішп.)

«Ляну́с» (па-гішпанску: Lanús) — аргентынскі футбольны клюб з гораду Лянус, які належыць да аглямэрацыі Вялікага Буэнас-Айрэсу. Клюб быў заснаваны ў 1915 годзе, а ягонымі асноўнымі відамі спорту ёсьць футбол і баскетбол, але таксама функцыянуюць сэкцыі па лёгкай атлетыцы, спартовай гімнастыцы, гандболе, хакеі на траве, тэнісе, валейболе ды іншых відах спорту. Гэтак званая «Паўднёвая клясыка» ўважаецца за адное з дэрбі аргентынскага футболу, у якім адзін аднаму супрацьстаіць «Лянус» і «Банфільд».

Гісторыя

Спачатку існавалі дзьве структуры пад назовам «Лянус». Адной зь іх быў атлетычны клюб «Лянус», які браў удзел у чэмпіянаце Аргентыны 1897 году, але потым адмовіўся ад удзелу ў спаборніцтвах. Іншым клюбам быў «Лянус Юнайтэд», які ўважаецца за папярэднік сучаснага клюбу. Ён браў удзел у Копа кампэтэнсіі, то бок турніры альтэрнатыўнай Аргентынскай фэдэрацыяй футболу ў 1913 і 1914 гадах. 3 студзеня 1915 году ў выніку зьліцьця дзьвюх камандаў, сярод якіх быў гаротны ў фінансавым пляне «Лянус Юнайтэд» і клюб «Эль-Прагрэса», паўстаў сучасны футбольны клюб. Першым прэзыдэнтам утворанай каманды стаў Мігель Усарай. На сходзе, які ладзіўся 27 студзеня 1915 году, была афіцыйна зацьверджаная назва «Лянус»^[1].

Клюб запачаткаваў выступы ў другім дывізіёне аргентынскай футбольнай лігі, гуляючы на старым стадыёне «Лянус Юнайтэд», разьмешчаным на вуліцах Маргарыты Вільд і Генэрала Дээзы. У 1919 годзе клюб прабіўся ў найвышэйшы дывізіён пасьля перамогі над клюбам «Аргентына» з Кільмэсу. «Лянус» дэбютаваў у элітным дывізіёне, але хутка сышоў да альтэрнатыўнай Асацыяцыі аматараў футболу. У наступныя гады «Лянус» не дасягаў вялікіх посьпехаў у чэмпіянатах краіны, нават заняўшы апошні радок у 1923 годзе. У тым сэзоне каманда здабыла толькі дзьве перамогі і прагуляла 14 з 20 гульняў. У 1926 годзе «Лянус» быў на шостым радку, а ў сэзоне 1927 году скончыў розыгрыш на трэцім месцы, саступіўшы «Сан-Лярэнса» і «Бока Хуніёрс». 24 лютага 1929 году «Лянус» перабраўся на свой новы стадыён на скрыжаваньні вуліцаў Эктара Гвідзі і Генэрала Арыяса. Стадыён на той час меў драўляныя трыбуны, што было звычайнай справай на той час. Ён быў пабудаваны на зямлі плошчай у 50 тысяч м², якую надала брытанскай кампаніяй, павязаная з чыгункай.

Сярод найбольш вядомых гульцоў 1930-х гадоў быў Атыліё Дука. У 1939 годзе да клюбу далучыўся нападнік Люіс Арыета, які правёў 31 гол у свой першы сэзон. Арыета таксама стаў найлепшым бамбардзірам лігі ў 1943 годзе. «Лянус» заставаўся ў Прымэры да 1949 году, калі каманда вылецела ў выніку спрэчнай пастановы асацыяцыі.