Кім Бутэн

	Кім Бутэн
Пэрсанальная інфармацыя
Нарадзілася	16 сьнежня 1994 (31 год); Шэрбрук, Квэбэк, Канада;
Грамадзянства	Канада;
Прафэсійная інфармацыя
Спэцыялізацыя	шорт-трэкістка, канькабежка

Кім Бутэ́н (па-француску: Kim Boutin; нар. 16 сьнежня 1994 году) — канадзкая шорт-трэкістка. Мэдалістка зімовых Алімпійскіх гульняў ды шматразовая чэмпіёнка сьвету.

Кар’ера

У 2014 годзе дэбютавала на этапе Кубка сьвету ў Солт-Лэйк-Сіці, дзе заняла 3-е месца ў эстафэтнай гонцы. З таго ж часу пачала трапляць на подыюм. У 2018 годзе канадка ўпершыню ўзяла ўдзел на зімовых Алімпійскіх гульнях^[1]^[2]. У асабістых спаборніцтвах яна спачатку заняла 4-ы радок у жаночым забегу на 500 мэтраў, але пасьля дыскваліфікацыі судзьдзём паўднёвакарэянкі Чэ Мін Чжон, якая фінішавала другой на фатафінішы, Бутэн была прысуджаная бронза. Таксама на тых гульнях узяла бронзу на дыстанцыі ў 1500 мэтраў і срэбра на 1000 мэтраў. Дзякуючы тром індывідуальным мэдалям, якія Бутэн заваявала ўпершыню сярод канадзкіх шорт-трэкістак, яна была прызначаная сьцяганосцам Канады на цырымонію закрыцьця^[3]. Праз год спартоўка на чэмпіянаце сьвету ўзяла некалькі мэдалёў, стаўшы трэцяй у агульным заліку. 3 лістапада 2019 году ўсталявала новы сусьветны рэкорд у жаночым забегу на 500 мэтраў, калі ёй спатрэбілася 41,936 сэкундаў на пераадоленьне дыстанцыі^[4]. Праз траўму калена прапусьціла чэмпіянат чатырох кантынэнтаў 2020 году ў Манрэалі ды чэмпіянат сьвету 2021 году ў Дордрэхце.

На зімовых Алімпійскіх гульнях 2022 году здабыла толькі бронзавы мэдаль на дыстанцыі 500 мэтраў, але празь некалькі месяцаў у красавіку ўзяла срэбныя мэдалі ў індывідуальных забегах на 500, 1000 і 1500 мэтраў і ў эстафэце на 3000 мэтраў, у выніку чаго стала другой у агульным заліку сусьветнага першынства. У сэзоне 2022—2023 гадоў Бутэн атрымала перамогу на двух этапах Кубка сьвету ў забегах на 500 мэтраў у Алматы і Манрэалі ды была другой у Дордрэхце, што ў выніку дало ёй трэці радок агульнага заліку Кубка сьвету на дыстанцыі 500 мэтраў. На чэмпіянаце сьвету 2024 году ў Ратэрдаме ўпершыню стала чэмпіёнкай на дыстанцыі 500 мэтраў. Праз год у Пэкіне зноў разжылася двума залатымі мэдалямі ў эстафэтных дысцыплінах.

Крыніцы

↑ Nichols, Paula (08.2017) 10 short track speed skaters nominated to Team Canada for PyeongChang 2018. Canadian Olympic Committee.
↑ Gold medallist Hamelin to lead Canada's 2018 short-track team. Sportsnet (08.2017).
↑ Kim Boutin named Canada's flag-bearer for closing ceremony // 02.2018 г. Архіўная копія ад 02.2018 г.
↑ Kim Boutin sets short track world record in women's 500m in Utah // CBC Sports, 11.2019 г.

Вонкавыя спасылкі

Старонка на ShortTrackOnLine.info.

[1] Nichols, Paula (08.2017) 10 short track speed skaters nominated to Team Canada for PyeongChang 2018. Canadian Olympic Committee.

[2] Gold medallist Hamelin to lead Canada's 2018 short-track team. Sportsnet (08.2017).

[3] Kim Boutin named Canada's flag-bearer for closing ceremony // 02.2018 г. Архіўная копія ад 02.2018 г.

[4] Kim Boutin sets short track world record in women's 500m in Utah // CBC Sports, 11.2019 г.

[1]

[2]

[3]

[4]