Клеман Наэль

	Клеман Наэль
Пэрсанальная інфармацыя
Нарадзіўся	3 траўня 1997 (29 гадоў); Рэмірмон[d];
Грамадзянства	Францыя;
Прафэсійная інфармацыя
Спэцыялізацыя	гарналыжнік
	Узнагароды і мэдалі

Клема́н Наэ́ль (па-француску: Clément Noël; 3 траўня 1997 году) — францускі гарналыжнік, які спэцыялізуецца на слаламе. Алімпійскі чэмпіён 2022 году.

Кар’ера

Запачаткаваў выступы на этапах Кубку сьвету ў лістападзе 2016 году ў фінскім Леві. 26 сакавіка 2017 году стаў чэмпіёнам краіны па слаламе ў элітнай клясе, а ў канцы год 10 сьнежня 2017 году на трасе ў Валь-д’Ізэр набраў свае першыя пункты ў Кубку сьвету, заняўшы 20-ы радок у слаламе. 21 студзеня 2018 году ўпершыню трапіў у дзясятку найлепшых, заняўшы восьмае месца ў слаламе ў Кіцбюэлі.

20-гадовы Наэль выступіў на зімовых Алімпійскіх гульнях 2018 году ў Пхёнчхане і заняў чацьвертае месца ў слаламе, саступіўшы ўсяго 0,04 сэкунды бронзаваму прызэру Міхаэлю Мату. Гарналыжнік таксама выступаў у камандных спаборніцтвах, дзе французы дакрочылі да паўфіналу, але спачатку саступілі швайцарцам, а затым у барацьбе за трэці радок былі пераможаныя нарвэжцамі. 13 студзеня 2019 году ўпершыню ўзьняўся на подыюм на этапах Кубка сьвету, што адбылося ў Адэльбадэне, дзе ён паказаў другі час паводле суме дзьвюх спробаў у слаламе. 20 студзеня 2019 году ў швайцарскім Вэнгене ўпершыню перамог на этапе Кубку сьвету, хутка зрабіўшы тое самае двойчы да канца сэзону. У выніку француз скончыў сэзон на другім месцы ў заліку слаламу. У наступныя тры сэзоны стала фінішаваў паводле вынікаў на другім радку слаламнай клясыфікацыі. Пры гэтым спартовец стала зьяўляюся на подыюмах.

16 лютага 2022 году здабыў залаты мэдаль у слаламе на зімовых Алімпійскіх гульнях у Пэкіне^[2]. У першай спробе Наэль быў шостым паводле часу, але ў другой апярэдзіў усіх канкурэнтаў. Найбліжэйшы супернік Яганэс Штрольц быў апярэджаны на 0,61 сэкундаў. У выніку Наэль стаў адзіным французам, які разжыўся золатам у гарналыжным спорце на гульнях. У сэзоне 2023—2024 гадоў ня здолеў узяць аніводнай перамогі на этапах Кубка сьвету, але ў наступным сэзоне чатыры разы запар у сваіх выступах перамагаў на этапах Кубка сьвету. Паводле вынікаў сэзону ўпершыню трапіў у першую дзясятку ў агульным заліку.

На чэмпіянаце сьвету 2025 году ў Заальбах-Гінтэрглеме Наэль лідаваў у слаламе пасьля першай спробы, але сышоў з дыстанцыі ў другой.

Крыніцы

↑ https://olympics.com/beijing-2022/olympic-games/en/results/alpine-skiing/athlete-profile-n1035770-clement-noel.htm
↑ Beijing 2022: Clement Noel becomes slalom Olympic Champion (рас.). FIS (2022-02-20). Праверана 2026-01-10 г.

Вонкавыя спасылкі

Профіль (анг.) на FIS

[_462204d9c2e955e3-1] ttps://olympics.com/beijing-2022/olympic-games/en/results/alpine-skiing/athlete-profile-n1035770-clement-noel.htm

[2] Beijing 2022: Clement Noel becomes slalom Olympic Champion (рас.). FIS (2022-02-20). Праверана 2026-01-10 г.

[1]

[2]