Перайсьці да зьместу

Дэм’ен Лілард

Зьвесткі зь Вікіпэдыі — вольнай энцыкляпэдыі
Дэм’ен Лілард
па-ангельску: Damian Lamonte Ollie Lillard[1]
Пазыцыя: гульнёвы абаронца
Рост: 188 см[2]
Вага: 88 кг[2]
Грамадзянства:
Нарадзіўся: 15 ліпеня 1990(1990-07-15)[2][3] (35 гадоў)
Альма-матэр:
Драфт

6, драфт НБА 2012 году
Портлэнд Трэйл Блэйзэрз

Клюбная інфармацыя
Клюб Портлэнд Трэйл Блэйзэрз
Нумар 0
Клюбы
Гады Клюб
2008—2012 Ўэбэр Стэйт Ўайлдкэтс[d]
2012—2023 Портлэнд Трэйл Блэйзэрз
2023—2025 Мілўокі Бакс
2025—4 Портлэнд Трэйл Блэйзэрз
Асабістыя ўзнагароды і дасягненьні
Статыстыка на NBA.com

Дэм’ен Лілард (па-ангельску: Damian Lillard; нар. 15 ліпеня 1990 году) — амэрыканскі баскетбаліст клюбу «Портлэнд Трэйл Блэйзэрз» з НБА. У складзе зборнай ЗША рабіўся алімпійскім чэмпіёнам 2020 году. У 2021 годзе ён быў улучаны ў зборную НБА да 75-годзьдзя лігі[4]. Па-за пляцоўкай займаецца рэп-музыкай пад сцэнічнай мянушкай Dame D.O.L.L.A.

Кар’ера

[рэдагаваць | рэдагаваць код]

Быў абраны ў першым раўндзе драфту НБА 2012 году пад агульным 6-м нумарам клюбам «Портлэнд Трэйл Блэйзэрз». 31 кастрычніка 2012 году дэбютаваў у НБА ў гульні супраць «Лос-Анджэлес Лэйкерз», набраўшы 23 пункты і зрабіўшы 11 перадач. Такім чынам, ён стаў трэцім гульцом у гісторыі лігі пасьля Оскара Робэртсана і Айзэі Томаса, які набраў больш за 20 пунктаў і 10 перадач у сваёй дэбютнай гульні. Узімку яго запрасілі на зорны ўік-энд, дзе ён перамог у конкурсе майстэрства. Паводле вынікаў сэзону ён быў прызнаны пачаткоўцам году НБА.

Лілард выконвае штрафны кідок у 2019 годзе.

У наступным годзе Лілард у другі раз выйграў спаборніцтвы па майстэрству на матчы ўсіх зорак НБА, а таксама ўпершыню ўзяў удзел у матчы ўсіх зорак. Ён набіраў у сярэднім 20,7 пунктаў і рабіў 5,6 перадачы за сэзон і дапамог камандзе прабіцца ў плэй-оф. Там «Портлэнд» перамог «Г’юстан Рокетс» у першым раўндзе, калі Лілард закінуў вырашальны трохпунктавы кідок пасьля гукавога сыгналу, які вывеў каманду наперад. У другім раўндзе «Портлэнд» саступіў будучаму чэмпіёну «Сан-Антоніё Спэрз». 19 сьнежня 2014 году ў матчы супраць «Сан-Антоніё Спэрз» гулец назьбіраў 43 пункты ў сваёй кар’еры. У лютым ён быў другі раз абраны дзеля ўдзелу ў матчы ўсіх зорак НБА, замяніўшы траўмаванага Блэйка Грыфіна. 4 сакавіка 2015 году ў матчы супраць «Лос-Анджэлес Кліпэрз» ён зрабіў 18 падбораў, што стала ягоным рэкордам у кар’еры. Ён дапамог камандзе прабіцца ў плэй-оф, але «Портлэнд» саступіў у першым раўндзе «Мэмфіс Грызьліз». 9 ліпеня 2015 году падпісаў з клюбам новы пяцігадовы кантракт на суму ў 120 мільёнаў даляраў[5]. 19 лютага 2016 году пераўзвысіў свой выніковы рэкорд, набраўшы 51 пункт у матчы супраць «Голдэн Стэйт Ўорыярз». 3 красавіка 2017 году быў прызнаны гульцом месяца ў Заходняй канфэрэнцыі. Пазьней ён набраў 59 пунктаў у гульні супраць «Юты Джаз», што стала як ягоным асабістым рэкордам, гэтак і рэкордам франшызы. У плэй-оф каманда сустрэлася з «Голдэн Стэйт» у першым раўндзе і пацярпела паразу зь лікам 0:4.

28 кастрычніка 2017 году ў сустрэчы супраць «Фінікс Санз» баскетбаліст набраў 9000-ы пункт у кар’еры. Дзеля гэтага яму спатрэбілася 402 гульні, такім чынам, ён стаў самым «хуткім» гульцом франшызы, які дасягнуў гэтага. 27 лістапада, зрабіўшы 2575 перадачаў за кар’еру, ён абышоў Рода Скрынлэнда ў сьпісе асыстэнаў Портлэнду і заняў чацьвертае месца. 9 сьнежня ён ураўнаў рэкорд франшызы, закінуўшы 9 трохпунктавых кідкоў у гульні супраць «Г’юстан Рокетс». 23 студзеня было абвешчана, што Лілард возьме ўдзел у матчы ўсіх зорак[6]. 2 лютага ён перасягнуў адзнаку ў 10 тысяч пунктаў у сваёй кар’еры, стаўшы наймаладзейшым гульцом у гісторыі клюбу, якому гэта ўдалося. 3 сакавіка ён закінуў трохпунктавы кідок у 45-м матчы запар, усталяваўшы рэкорд франшызы. 20 сакавіка гэтая сэрыя перарвалася, спыніўшыся на адзнацы ў 52 гульні. Добрая форма Ліларда падчас рэгулярнага сэзону ня здолела матэрыялізавацца ў плэй-оф, дзе ягоная каманда саступіла «Нью-Арлеан Пэліканз» ў першым раўндзе. Паводле вынікаў сэзону быў улучаны ў каманду ўсіх зорак НБА, стаўшы толькі трэцім гульцом франшызы, які трапіў у першую каманду НБА, пасьля Клайда Дрэксьлера і Біла Ўолтана[7].

Гулец у 2021 годзе.

27 кастрычніка 2018 году ў матчы супраць «Маямі Гіт» ён набраў 42 пункты, перасягнуўшы адзнаку ў 11 тысяч пунктаў у кар’еры. 28 лістапада ў гульні супраць «Арланда Мэджык» ён назьбіраў 41 пункт і ўсталяваў рэкорд клюбу, пацэліўшы 10 трохпунктавых кідкоў. У плэй-оф ён дапамог камандзе перамагчы «Аклагому-Сіці Тандэр» у першым раўндзе, закінуўшы пераможны трохпунктавы кідок пры гукавым сыгнале ў 5-й гульні сэрыі. Далей «Портлэнд» перамог «Дэнвэр Нагетс» у другім раўндзе і ўпершыню з 2000 году прасунуўся ў фінал Заходняй канфэрэнцыі. Каманда Ліларда зазнала паразу ад «Голдэн Стэйт Ўорыярз» у сэрыі з чатырох гульняў і выйшла ў фінал НБА. 8 лістапада 2019 году набраў 60 пунктаў у матчы супраць «Бруклін Нэтс». 20 студзеня 2020 году ў матчы супраць «Голдэн Стэйт Ўорыярз» ён набраў 61 пункт. Празь дзевяць дзён ён зрабіў свой першы ў кар’еры трыпл-дабл, набраўшы 36 пунктаў, зрабіўшы 10 падбораў і 11 перадач у матчы супраць «Г’юстана». 30 студзеня 2020 году ён у пяты раз быў абраны на матч усіх зорак НБА, але ня здолеў узяць удзел праз траўму. 11 жніўня 2020 году ў матчы супраць «Далас Мавэрыкс» ён паўтарыў сваё бамбардзірскае дасягненьне, набраўшы 61 пункт. Ён стаў другім гульцом у гісторыі пасьля Ўілта Чэмбэрлена, які набраў 60 і больш пунктаў у трох гульнях за адзін сезон.

У 2021 годзе дапамог камандзе трапіць у плэй-оф, але адтуль клюб быў выбіты «Дэнвэрам», не зважаючы на 55 набраных пунктаў гульца ў пятым матчы сэрыі. 13 студзеня 2022 году Ліларду зрабілі апэрацыю праз пашкоджаньне чэраўнай паражніны, чым быў выключаны на 6—8 тыдняў[8][9]. 10 лютага часовы генэральны менэджэр «Блэйзэрз» Джо Кронін заявіў, што Лілард «хутчэй за ўсё» прапусьціць сэзон 2021—2022 гадоў[10]. 21 сакавіка Лілард быў афіцыйна выключаны на рэшту сэзону[11]. Прапусьціўшы апошнія 47 гульняў у леташнім сэзоне праз траўму, Лілард набраў 41 пункт у другой і трэцяй гульнях «Портлэнду» ў новым сэзоне[12]. Лілард стаў адным з васьмі гульцоў усіх часоў, якія двойчы набіралі ня менш за 40 пунктаў у першых трох гульнях сваёй каманды ў сэзоне. 25 студзеня 2023 году Лілард набраў 60 пунктаў, закінуўшы дзевяць трохпунктвых, а таксама зрабіў сем падбораў, восем перадач і тры перахопы ў пераможным зь лікам 134:124 матчы супраць «Юты Джаз». 26 лютага ён пераўзвысіў гэты паказьнік, зарабіўшы 71 пункт у матчы супраць «Г’юстан Рокетс».

У верасьні 2023 году гулец быў абменены ў «Мілўокі Бакс» у рамках грандыёзнай дамовы паміж трыма клюбамі, у якой яшчэ браў удзел «Фінікс Санз». Лілард дэбютаваў у «Бакс» 26 кастрычніка 2023 году ў матчы супраць «Філадэльфіі Сэвэнці Сыксэрз», набраўшы 39 пунктаў[13]. 19 сьнежня Лілард набраў 40 пунктаў у пераможным матчы супраць «Сан-Антоніё Спэрз» і пераадолеў паказьнік у 20 тысяч пунктаў за кар’еру[14]. 30 студзеня 2025 году Лілард быў прызначаны запасным на матч усіх зорак НБА, такім чынам ён дзявяты раз узяў удзел у матчы ўсіх зорак[15]. 27 красавіка ў чацьвертай гульні сэрыі супраць «Індыяны Пэйсэрз» Лілард атрымаў траўму левай лыткі ў першай чвэрці, спрабуючы зрабіць падбор. МРТ, зробленая на наступны дзень, выявіла, што ў баскетбаліста адбыўся разрыў ахілавага сухажыла, што датэрмінова завершыла ягоны сэзон, а таксама паставіла пад сумнеў гатоўнасьць гульца да сэзону 2025—2026 гадоў[16]. 6 ліпеня каманда адмовілася ад Ліларду, але ўжо 19 ліпеня ён узгодніў трохгадовую працоўную ўгоду з «Портлэнд Трэйл Блэйзэрз» на 42 мільёны даляраў[17].

Крыніцы

[рэдагаваць | рэдагаваць код]
  1. ↑ Damian Lamonteollie Lillard, Born 07/15/1990 in California | CaliforniaBirthIndex.org
  2. 1 2 3 Нацыянальная баскетбольная асацыяцыя — 1946.
  3. 1 2 Damian Lillard // FIBA database
  4. ↑ «NBA’s 75 Anniversary Team Players». NBA.
  5. ↑ «Trail Blazers Sign Damian Lillard to Contract Extension». NBA.
  6. ↑ «Damian Lillard named NBA Western Conference all-star». Portland Trail Blazers.
  7. ↑ «Damian Lillard Named All-NBA First Team». Portland Trail Blazers.
  8. ↑ Windhorst, Brian (12.01.2022). «Portland Trail Blazers’ Damian Lillard has surgery for abdominal injury». ESPN.
  9. ↑ Peterson, Anne (22.01.2022). «Portland’s Damian Lillard discusses his surgery, possible return». NBA.
  10. ↑ «Damian Lillard 'Most Likely' Done for Season with Abdominal Injury, Blazers GM Says». Bleacher Report.
  11. ↑ «Damian Lillard injury update». NBA.
  12. ↑ «Lillard, Grant lead Blazers’ late rally past Lakers, 106-104». ESPN.
  13. ↑ «Lillard scores 39 points in his Bucks debut to help Milwaukee edge the Philadelphia 76ers 118-117». APnews.
  14. ↑ Postrado, Jay (19.12.2023). «Damian Lillard’s heartfelt take on reaching 20,000 points with Bucks». ClutchPoints.
  15. ↑ «Victor Wembanyama, Jaylen Brown highlight 2025 All-Star Game reserves». NBA.
  16. ↑ Wimbish, Jasmyn (27.04.2025). «Damian Lillard injury update: Bucks star diagnosed with torn Achilles suffered during playoff game, per report». CBS Sports.
  17. ↑ Holdahl, Casey (19.07.2025). «Trail Blazers Sign Nine-Time All-Star Damian Lillard». NBA.
Атрымана з «https://be-tarask.wikipedia.org/w/index.php?title=Дэм’ен_Лілард&oldid=2639630»