Герб Нямеччыны

Зьвесткі зь Вікіпэдыі — вольнай энцыкляпэдыі
Герб Нямеччыны
Герб падчас Нямецкага Райху

Герб Нямеччыны — афіцыйны дзяржаўны сымбаль Фэдэратыўнай рэспублікі Нямеччына. Выява ўяўляе сабой чорнага арла з чырвонымі лапамі на залатым фоне.

Гісторыя[рэдагаваць | рэдагаваць крыніцу]

На гербе Фэдэратыўнай Рэспублікі Нямеччына намаляваны арол. Гэтая птушка ўслаўлялася людзьмі з найстаражытных часоў, быўшы сымбалям мужнасьці, жыцьцёвай сілы і сонца. У часы Карла Вялікага чорны арол на залатым фоне быў прызнаны гербам Сьвятой Рымскай імпэрыі. Праўда, з XV стагодзьдзя сымбалям імпэратара Сьвятой Рымскай імпэрыі становіцца двухгаловы арол з адзінай каронай над двума галовамі. Пазьней, у XIX стагодзьдзі двухгаловы арол становіцца сымбалям улады (гербам) Аўстра-Вугоршчыны, а ў часы агульнанямецкага парлямэнту (1848 год) (Paulskirchenparlament) — гербам нямецкага райха. У гербах шматлікіх каралеўстваў, герцагстваў і графстваў акрамя арла выкарыстоўваліся іншыя сымбалі: ключы, крэпасьці, мядзьведзі, львы, кароны і шматлікае іншае. Арол як дзяржаўны сымбаль працягвае сваю гісторыю і ў часы аб'яднанага нямецкага райха (1871—1918 г.г.), і ў часы Вэймарскай рэспублікі (1918—1933 г.г.). Нацысты таксама выкарысталі малюнак арла са свастыкай у кіпцюрах як дзяржаўны сымбаль сваёй улады. Арол на гербе кайзэраўскай Нямеччыны меў карону. У рэспубліканскія часы карона як сымбаль манархіі назаўжды зьнікла з нямецкага гербу. Пасьляваенная Нямеччына пераняла выяву арла як дзяржаўны сымбаль у Вэймарскай рэспублікі.

Эскіз цяперашняга гербу быў выкананы мастаком Табіасам Швабам яшчэ ў 1926 годзе. Цяперашні нямецкі арол мае карацейшы хвост і не так дэталёва прамаляваныя пёры. Ды і сама выява стала больш умоўнай, чым у часы Вэймарскай рэспублікі. Як герб краіны арол быў уведзены Фэдэральным прэзыдэнтам Нямеччыны Тэадорам Хойсам 20 студзеня 1950 году. Тэкст апісаньня гербу быў практычна бяз зьмен пераняты з апісаньня гербу Вэймарскай рэспублікі, толькі слова «райx» было заменена на слова «бунд».

Для выявы арла на дзяржаўных пячатках, сьцягах, манэтах і паштовых марках былі таксама выкарыстаныя эскізы часоў Вэймарскай рэспублікі.


Глядзіце таксама[рэдагаваць | рэдагаваць крыніцу]

Вонкавыя спасылкі[рэдагаваць | рэдагаваць крыніцу]

Герб Нямеччынысховішча мультымэдыйных матэрыялаў