Войны Пэнтагону
| Войны Пэнтагону | |
| па-ангельску: The Pentagon Wars | |
| Жанр | ваенны фільм[d] |
|---|---|
| Рэжысэр | |
| Сцэнарыст | |
| У ролях | |
| Распаўсюд | HBO[d] і Netflix |
| Дата выхаду | 1998 |
| Працягласьць | 103 хвіліна |
| Краіна | |
| Мова | ангельская |
| Старонка на IMDb | |
Войны Пэнтагону (па-ангельску: The Pentagon Wars) — камэдыйны тэлефільм рэжысэра Рычарда Бэнджаміна, выпушчаны ў 1998 року на канале HBO. Створаны паводле кнігі палкоўніка ВПС ЗША Джэймза Бэртана Войны Пэнтагону: Рэфарматары кідаюць выклік старой гвардыі і апавядае гісторыю распрацоўкі баявой машыны Брэдлі.
Сюжэт
[рэдагаваць | рэдагаваць крыніцу]Праект баявога аўтамабілю «Брэдлі» завіс на стадыі распрацоўкі на сямнаццаць гадоў і ўжо выкарыстаў 14 мільярдаў даляраў. Кангрэс ЗША вырашае накіраваць для нагляду праекту, якім займаецца генэрал-маёр Партрыдж, падпалкоўніка ВПС ЗША Джэймза Бэртана.
Партрыджу не падабаецца Бэртанава актыўнасьць, і ён наказвае загрузіць таго дакумэнтацыяй за ўвесь час праекту. Джэймз Бэртан пачынае ў ёй разьбірацца і высьвятляе, што ў 1960-х распрацоўку пачынаў тагачасны палкоўнік Робэрт Л. Сьміт, якога неўзабаве разьюшылі сталыя зьмены патрабаваньняў вышэйшага кіраўніцтва, у выніку чаго зь лёгкай баявой машыны пяхоты «Брэдлі» ператварыўся ў грувасткі танк, здольны перавозіць толькі палову ад заплянаванай колькасьці вайскоўцаў.
Таксама Бэртан выяўляе неадпаведнасьці ў выніках тэставаньняў «Брэдлі», пачынаючы ад выкарыстаньня слабой процітанкавай зброі да наўмысных хітрыкаў з вагнявымі выпрабаваньнямі, якімі займаліся Партрыджавы паплечнікі — палкоўнік Бок і маёр Сэерс. Урэшце Бэртан атрымлівае канфідэнцыйную інфармацыю ад Сьміта, але толькі пры ўмове ягонай ананімнасьці. Таксама ён даведваецца ад майстра-сяржанта Долтана, які адказвае за палявыя выпрабаваньні машыны, што яму заўсёды загадвалі падрабляць вынікі тэстаў; Долтан разглядае і Бэртана адным з тых, хто прыяжджалі ў праект з добрымі намерамі, але заўсёды сыходзілі, задаволеныя чарговым падвышэньнем.
Бэртан, аднак, працягвае настойваць на выпрабаваньнях, тады Партрыдж пераводзіць яго на Аляску. Тады генэрал Сьміт распавядае яшчэ адну таямніцу, у выніку чаго міністар абароны Каспар Ўайнбэргер патрабуе ад Брэдлі поўнага пісьмовага дакладу. Партрыдж скасоўвае перавод Бэртана на Аляску і атрымлівае ягоную справаздачу, у якую ўносіць зьмены, якія цалкам перакручваюць напісанае. Бэртан прымае правілы гульні і карыстаецца сваім становішчам, каб пазначыць усе ўнесеныя Партрыджам зьмены ў мэмарандуме, які трапляе ў СМІ, пасьля чаго Камітэт узброеных сілаў распачынае слуханьні ў Кангрэсе.
Партрыдж безабаронны перад удзельнікамі слуханьняў і атрымлівае ад старшынькі камісіі загад правесьці тэсты, якіх патрабаваў Бэртан. Наконадні выпрабаваньняў да жаўнераў, якія будуць іх выконваць, завітвае Бэртан і пераконвае іх не падрабляць вынікі, як яны заўжды рабілі, а задумацца пра бясьпеку ўласную і будучых карыстальнікаў браневіка.
Перад выпрабаваньнем Партрыдж выдае красамоўную прамову пра дасканаласьць і сілу «Брэдлі». Але пры абстрэле машына выбухае і цалкам зьнішчаецца. Долтан зь ягонымі падначаленымі задаволеныя, што нягледзячы на ўвесь ціск Партрыджа, Бэртан урэшце здолеў давесьці сваю справу да канца.
Фінальныя тытры паведамляюць, што «Брэдлі» ў выніку цалкам перапрацавалі ў адпаведнасьці з Бэртанавымі заўвагамі, што дапамагло значна зьменшыць колькасьць ахвяраў у часе вайны ў заліве. Большасьць афіцэраў, якія займаліся распрацоўкай бронеаўтамабілю, атрымалі падвышэньні, а Бэртана змусілі звольніцца.
Акторскі склад
[рэдагаваць | рэдагаваць крыніцу]| Актор | Роля |
|---|---|
| Келсі Грэмэр | генэрал-маёр Партрыдж |
| Керы Ілвэз | падпалкоўнік Джэймз Гордан Бэртан |
| Віёла Дэвіс | сяржант Фэнінг |
| Джон Макгінлі | палкоўнік Дж. Д. Бок |
| Том Райт | маёр Ўільям Сэерс |
| Кліфтан Паўэл | сяржант Бэнджамін Долтан |
| Д’юі Ўэбэр | |
| Рычард Шыф | палкоўнік Сьміт |
| Джон Чарльз Маккензі | Джонз |
| Рычард Бэнджамін | Каспар Вайнбэргер |
| Алімпія Дукакіс | мадам старшыня |
| Сэм Андэрсан | кангрэсмэн |
| Рэндзі Огэлзьбі | генэрал на палігоне |
| Дэн Флорэк | генэрал-маёр Боб Брэйдэн |
| Бо Білінгсьлі | генэрал Райнэра |
| Рычард Рылі | генэрал Вайс |
| Крыс Эліс | генэрал Кін |
| Дру Снайдэр | адмірал Моргаўз |
| Брус Фрэнч | генэрал Дэ Граса |
| Тым Дыкей |
Вытворчасьць
[рэдагаваць | рэдагаваць крыніцу]Кансультантам пры здымках быў уласна палкоўнік Джэймз Бэртан.
Здымкі адбываліся ў Каліфорніі.
Ацэнкі
[рэдагаваць | рэдагаваць крыніцу]На агрэгатары рэцэнзій Rotten Tomatoes фільм мае рэйтынг ухвалы 84%[1].
Узнагароды
[рэдагаваць | рэдагаваць крыніцу]- Прайм-таймавая прэмія «Эмі» 1998: Эмі Стофскі (касьцюмэрка): найлепшыя строі для міні-сэрыялаў, фільмаў ці спэцыяльнай перадачы[2]
- Калямбускі міжнародны кіна- і відэафэстываль 1998: ляўрэат прэміі Крыса за сацыяльныя праблемы
Крыніцы
[рэдагаваць | рэдагаваць крыніцу]Літаратура
[рэдагаваць | рэдагаваць крыніцу]- James G. Burton. The Pentagon Wars: Reformers Challenge the Old Guard (Annapolis, MD: Naval Institute Press, 1993), ISBN 1-55750-081-9
Вонкавыя спасылкі
[рэдагаваць | рэдагаваць крыніцу]- Войны Пэнтагону (анг.) на сайце IMDb