Боепрыпас

Боепрыпас (баявы прыпас) — складавая частка ўзбраення, якая непасрэдна прызначана для паражэньня жывой сілы і тэхнікі, разбурэньня збудаваньняў (умацаваньняў) і выкананьня спецыяльных задач (асвятленьня, задымленьня, перакіданьня агітацыйнай літаратуры і інш.)

У лік баепрыпасаў уваходзяць артылерыйскія выстралы, рэактыўныя снарады, баявыя (галаўныя) часткі ракет і тарпэд, патроны да стралковай зброі, гранаты, авіяцыйныя і глыбінныя бомбы, інжынерныя і марскія міны, падрыўныя зарады, дымавыя шашкі.

Павдле прыналежнасці выдзяляюцца баепрыпасы: артылерыйскія, авіяцыйныя, марскія, стралковыя, інжынерныя.

Паводле прызначэньня выдзяляюцца баепрыпасы: асноўныя (для паражэньня цэляў), спецыяльныя (для асвятленьня, задымленьня і пад.) і дапаможныя (вучэбныя, пустыя (халастыя), для спецыяльных выпрабаванняў і пад.).

Паводле характару паражэньня выдзяляюцца баепрыпасы: са звычайным выбуховым рэчывам («канвенцыйныя»), ядзерныя, хімічныя, біялагічныя, аб'ёмнага выбуху і інш.