Перайсьці да зьместу

Аляксандар Зьвераў

Зьвесткі зь Вікіпэдыі — вольнай энцыкляпэдыі
Аляксандар Зьвераў
Краіна
Пражывае ў
Нарадзіўся 20 красавіка 1997(1997-04-20)[1] (29 гадоў)
Рост 198 см
Вага 90 кг
Пачатак кар’еры 2013 — цяпер
Прызавыя грошы 66 017 932 $[2]
Адзіночны разрад
Матчаў 558–233[2]
Тытулаў 24
Найвышэйшы рэйтынг 2 (13 чэрвеня 2022)
Турніры Вялікага шлему
Аўстралія фінал (2025)
Францыя фінал (2024)
Ўімбэлдан 4 раўнд (2017, 2021, 2024)
ЗША фінал (2020)
Асноўныя турніры
Кубак Мастэрз перамога (2018, 2021)
Алімпіяда золата (Токіё, 2021)
Парны разрад
Матчаў 76–96[2]
Тытулаў 3
Найвышэйшы рэйтынг 68 (18 сакавіка 2019)
Турніры Вялікага шлему ў пары
Францыя 1 раўнд (2016)
Аляксандар Зьвераў у Вікісховішчы

Алякса́ндар Зьве́раў (па-нямецку: Alexander Zverev; нар. 20 красавіка 1997 году) — нямецкі тэнісіст. У чэрвені 2022 году ён узьняўся на другі радок сусьветнага рэйтынгу ў мужчынскім адзіночным разрадзе паводле вэрсіі Асацыяцыі тэнісістаў-прафэсіяналаў (АТП). Паходзіць з расейскай сям’і тэнісістаў, якія пераехалі ў Гамбург.

Кар’ера

[рэдагаваць | рэдагаваць код]
Зьвераў на US Open у 2016 годзе.

Дэбютаваў на турнірах АТП у 2014 годзе ў веку 17 гадоў. Свой першы сэзон скончыў на 136-м месцы ў рэйтынгу[3]. У наступным сэзоне спартовец трапіў у фінал адкрытага чэмпіянату Баварыі ў парным разрадзе. Год скончыў на 83-м радку рэйтынгу адзінкавага разраду[3][4]. Як наймаладзейшы гулец у топ-100, ён быў прызнаны наваком году АТП[5]. У наступным сэзоне тэнісіст хутка прасоўваўся ў рэйтынгу. Гэтаму паспрыяла прасоўваньне ў фіналы на турнірах у Ніццы і Гале[6]. Крыху пазьней Зьвераў перамог на адкрытым чэмпіянаце Санкт-Пецярбургу. Пасьля турніру Мастэрз у Шанхаі немец узьняўся на 20-е месца рэйтынгу. Падчас сэзону 2017 году Зьвераў значна палепшыў свае вынікі на турнірах найвышэйшага ўзроўню АТП-тура, за выняткам чатырох турніраў Вялікага шлему. На адкрытым чэмпіянаце Зюд-дэ-Франс спартовец узяў тытул як у адзінкавым, гэтак і ў парным разрадах. У тым жа годзе ён упершыню трыюмфаваў на турніры Мастэрз, узяўшы тытул на адкрытым чэмпіянаце Рыму. Вярнуўшыся на цьвёрдыя корты, Зьвераў выйграў свае апошнія два тытулы ў сэзоне ў жніўні. Зьвераў скончыў год на чацьвертым месцы ў рэйтынгу. Спартовец захоўваў сваё месца ў топ-5 рэйтынгу цягам усяго наступнага году[3], аднак ён усё яшчэ ня меў высокіх вынікаў на буйных турнірах. На грунтавых кортах спартовец узяў некалькі тытулаў, а на адкрытым чэмпіянаце Францыі ён прасунуўся да чвэрцьфіналу. Другая палова сэзону была цяжкай, але скончылася перамогай немца на выніковым турніры АТП. У фінале турніру тэнісіст перамог сэрба Новака Джокавіча зь лікам 6–4, 6–3.

У 2019 годзе ў Зьверава меліся цяжкасьці з гульнёю, а адзіны тытул быў здабыты на адкрытым чэмпіянаце Жэнэвы[7]. Тэнісіст тлумачыў свае цяжкасьці ў пачатку сэзону тым, што яго абцяжарвала судовая справа з сваім былым агентам Патрысіё Апэем, зь якім ён расстаўся ў міжсэзоньні[8]. Ён выбыў зь першай пяцёркі ў пачатку жніўня ўпершыню за амаль два гады[3], а сэзон Зьвераў скончыў на 7-м месцы ў сусьветным рэйтынгу[3]. Немец упершыню прабіўся ў паўфінал аднаго з турніраў Вялікага шлему, адзначыўся гэтым на адкрытым чэмпіянаце Аўстраліі 2020 году. Пачынаючы з 12 сакавіка і да пачатку жніўня АТП прыпыніла турніры праз пандэмію каранавірусу[9][10][11]. Па аднаўленьне спаборніцтваў Зьвераў дакрочыў да фіналу адкрытага чэмпіянату ЗША. У 2021 годзе ён выйграў свой 14-ы тытул АТП, перамогшы ў фінале на турніры ў Акапулька Стэфанаса Цыцыпаса[12]. Затым рушыла перамога на адкрытым чэмпіянату Мадрыду і выхад у паўфінал Ралян Гаросу, дзе спартовец саступіў Цыцыпасу ў пяці сэтах[13]. На Ўімбэлданскім турніры немец выбыў у чацьвертым раўндзе, але гэта не зашкодзіла яму вярнуцца ў ліпені 2021 году ў топ-5 амаль праз 2 гады. На летніх Алімпійскіх гульнях 2020 году, якія ладзіліся ў 2021 годзе празь перанос, атлет узяў залаты мэдаль для Нямеччыны. Да канца году ён разжыўся яшчэ некалькімі тытуламі, у тым ліку зноў стаў пераможцам выніковага турніру АТП.

Немец на турніры ў Монтэ-Карлё ў 2022 годзе.

У 2022 годзе спартовец даходзіў да фіналаў розных турніраў, але тытулаў яму бракавала. На адкрытым чэмпіянаце Францыі ў паўфінальным матчы супраць Рафаэля Надаля, ён скончыў матч праз 3 гадзіны і 13 хвілінаў пасьля пачатку пасьля таго, як пашкодзіў правую шчыкалатку і парваў усе тры бакавыя вязы[14]. У выніку спартоўца вывезьлі з корта ў інвалідным вазку[15]. Зьвераў паведаміў, што траўма вымусіць яго прапусьціць некалькі турніраў, а 8 чэрвеня 2022 году яму была зробленая апэрацыю па аднаўленьні разарваных вязаў[16]. Не зважаючы на вылет з Ралян Гаросу, 13 чэрвеня 2022 году ён дасягнуў найлепшага ў сваёй кар’еры месца ў сусьветным рэйтынгу, якім стаў другі радок[17]. Аднак, 2022 год спартовец скончыў на 12-м месцы ў рэйтынгу, то бок найніжэйшым за пяць гадоў[18]. Зьвераў упершыню пасьля траўмы шчыкалаткі вярнуўся ў тур, узяўшы ўдзел у першым Аб’яднаным кубку. Пасеяны пад 13-м нумарам на адкрытым чэмпіянаце Мадрыду, ён атрымаў сваю 350-ю перамогу ў кар’еры, стаўшы адзіным гульцом да 30 гадоў, які дасягнуў такога паказьніка[19][20]. Улетку вынікі спартоўца палепшыліся, то бок ён трапіў у паўфінал адкрытага чэмпіянату Жэнэвы і на Ралян Гаросе. На турніры ў Штутгарце ён таксама дакрочыў да паўфіналу[21]. Перамогай для тэнісіста стаў турнір у Гамбургу.

У Мэльбурне ён упершыню з 2020 году выйшаў у паўфінал адкрытага чэмпіянату Аўстраліі[22]. Пасьля гэтага быў шэраг няўдалых выступаў, але ў Рыме Зьвераў здабыў свой шосты тытул Мастэрз, перамогшы ў фінале Нікаляса Хары. На адкрытым чэмпіянаце Францыі гулец прасунуўся ў фінал буйнога турніру ўпершыню пасьля адкрытага чэмпіянату ЗША 2020 году і ў свой першы на грунте[23][24]. У спрэчным матчы ён саступіў Алькарасу. Пасьля шэрагу турнірах на травяных кортах, вярнуўшыся на грунт, Зьвераў дайшоў да фіналу ў Гамбургу, зазнаўшы паразу ад француза Арцюра Фіса ў трох сэтах[25]. Перамога чакала тэнісіста на турніры Мастэрз у Парыжы, дзе немец выгуляў у фінале Юго Юмбэра, вярнуўшыся на другі радок сусьветнага рэйтынгу. На пачатку 2025 году спартовец трапіў у свой трэці фінал турніру Вялікага шлему, згуляўшы там на Аўстраліян Оўпэн супраць Яніка Сынэра[26]. Немец саступіў італьянцу, а на пасьляматчавай прэсавай канфэрэнцыі ён разважаў пра сваю кар’еру і ціск ад таго, што ён ёсьць толькі сталым прэтэндэнтам на тытул Вялікага шлема, адзначыўшы, што ня хоча быць найлепшым гульцом у гісторыі безь Вялікага шлема[27][28][29]. Цягам наступных двух месяцаў Зьвераў даходзіў да чвэрцьфіналаў паўднёваамэрыканскіх турніраў, у якіх браў удзел. У красавіку 2025 году немец выйграў свой трэці тытул у Мюнхэне і 24-ы ў агульным заліку ў свой дзень народзінаў, абгуляўшы ў двух сэтах Бэна Шэлтана. На траве Зьвераў дакрочыў да свайго трэцяга фіналу цягам сэзону на турніры ў Штутгарце, зазнаўшы паразу ад Тэйлара Фрыца ў трох сэтах, што стала ягонай пятай паразай запар супраць амэрыканца[30]. Тэнісіст скончыў сэзон, заняўшы трэці радок у сусьветным рэйтынгу пасьля Сынэра і Алькараса.

Крыніцы

[рэдагаваць | рэдагаваць код]
  1. 1 2 Munzinger Personen (ням.)
  2. 1 2 3 Association of Tennis Professionals website
  3. 1 2 3 4 5 Alexander Zverev Rankings History. ATP Tour. Архіўная копія ад 06.10.2020 г.
  4. ↑ Zverev Survives Ymer In Stockholm. ATP Tour (19.10.2015). Архіўная копія ад 30.07.2021 г.
  5. ↑ Bryans, Chung, Djokovic, Federer, Paire & Zverev Honoured In 2015 ATP Tour Awards. ATP Tour (11.11.2015). Архіўная копія ад 30.07.2021 г.
  6. ↑ Zverev Dethrones Federer In Halle, Sets Mayer Final. ATP Tour (18.06.2016). Архіўная копія ад 30.07.2021 г.
  7. ↑ Zverev Saves 2 M.P. For Geneva Title. ATP Tour (25.05.2019). Архіўная копія ад 02.08.2021 г.
  8. ↑ His confidence "below zero", Zverev alludes to issues with ex-agent. Tennis.com. Архіўная копія ад 07.03.2021 г.
  9. ↑ ATP Suspends Tour For Six Weeks Due To Public Health & Safety Issues Over COVID-19 // www.atptour.com, 12.03.2020 г. Архіўная копія ад 02.04.2020 г.
  10. ↑ ATP tour chief not ruling out 2020 return // www.reuters.com, 09.05.2020 г. Архіўная копія ад 06.09.2023 г.
  11. ↑ Tennis-ATP Tour suspension extended to July 31 due to COVID-19 pandemic // www.devdiscourse.com, 15.05.2020 г.
  12. ↑ Zverev Clinches Acapulco Title In Tsitsipas Classic. www.atptour.com. Архіўная копія ад 24.04.2021 г.
  13. ↑ Zverev: 'I'm Not Satisfied With A Great Match, I Want To Win'. www.atptour.com. Архіўная копія ад 14.06.2021 г.
  14. ↑ Zverev Faces Extended Break After Ankle Surgery // www.atptour.com, 08.06.2022 г. Архіўная копія ад 05.10.2022 г.
  15. ↑ McGrogan, Ed. Alexander Zverev taken off court in wheelchair after rolling ankle against Rafael Nadal; Rafa advances to Roland Garros final, 7–6 (8), 6–6 // www.tennis.com, 03.06.2022 г. Архіўная копія ад 04.04.2023 г.
  16. ↑ Zverev Faces Extended Break After Ankle Surgery. ATP Tour (08.06.2022). Архіўная копія ад 09.06.2022 г.
  17. ↑ read, Riley MorganSports Reporter·3 min (07.06.2022) Alexander Zverev's brutal Wimbledon blow after horror injury. Yahoo Sports.
  18. ↑ Alexander Zverev beats Novak Djokovic to seal World Tennis League win for Team Hawks. Tennis.com (20.12.2022). Архіўная копія ад 06.12.2023 г.
  19. ↑ Berkok, John. Stat of the Day: Alexander Zverev battles to milestone 350th win of career in Madrid // www.tennis.com, 28.04.2023 г. Архіўная копія ад 10.06.2023 г.
  20. ↑ Zverev Sprints Through Finish In Madrid Marathon // www.atptour.com, 28.04.2023 г. Архіўная копія ад 05.05.2023 г.
  21. ↑ Rublev Sets Bublik Final In Halle. ATP (24.06.2023).
  22. ↑ Zverev thwarts Alcaraz escape bid to make semis | AO. ausopen.com. Архіўная копія ад 30.01.2024 г.
  23. ↑ Carlos Alcaraz, Alexander Zverev to meet in French Open final. NBC Sports (07.06.2024). Архіўная копія ад 07.06.2024 г.
  24. ↑ Alexander Zverev powers past out-of-sorts Casper Ruud to set up Carlos Alcaraz showdown in French Open final. Eurosport (07.06.2024). Архіўная копія ад 09.06.2024 г.
  25. ↑ Arthur Fils beats Zverev in thriller to clinch Hamburg Open title. Tennis Majors (21.07.2024). Архіўная копія ад 21.07.2024 г.
  26. ↑ Snape, Jack. Jannik Sinner playing different tune to everyone else in dismantling of Zverev // The Guardian, 26.01.2025 г.
  27. ↑ Zverev: "I don't want to end my career as the best player without a Grand Slam title". Puntodebreak.com. Архіўная копія ад 20.07.2025 г.
  28. ↑ Cambers, Simon (26.01.2025) Zverev: "I don't want to end my career as the best player never to win a Grand Slam". Tennis Majors.
  29. ↑ Australian Open: Zverev does not want to be 'the best player never to win a grand slam'. SportyTV.
  30. ↑ Taylor Fritz tops Alexander Zverev to win Stuttgart Open title. ESPN.com (15.06.2025).

Вонкавыя спасылкі

[рэдагаваць | рэдагаваць код]
Атрымана з «https://be-tarask.wikipedia.org/w/index.php?title=Аляксандар_Зьвераў&oldid=2670142»