Ак Барс
Каардынаты: 55°48′46″ пн. ш. 49°5′54″ у. д. / 55.81278° пн. ш. 49.09833° у. д.
| «Ак Барс» | |
 | |
 | |
| Тып | публічнае акцыйнае таварыства |
|---|---|
| Заснаваная | 29 лістапада 1993 (31 год таму) |
| Уласьнікі | Дзяржаўны жыльлёвы фонд пры прэзыдэнце Татарстану і ўрад Татарстану (па 20%), «Сувязьінвэстнафтахім» (14%) |
| Краіна | Расея |
| Разьмяшчэньне | Татарстан |
| Адрас | Казань, Кіраўскі раён, вуліца Сьнежаньцаў, дом 1[1] |
| Ключавыя фігуры | Валеры Сарокін (старшыня рады кіраўнікоў), Зуфар Гараеў (старшыня ўправы) |
| Галіна | сфэра паслугаў |
| Паслугі | абмен валюты, аплатная картка, банкаўскі рахунак, грашовы перавод, давернае кіраваньне, лізінг, пазыка, уклад, гандаль каштоўнымі мэталамі |
| Абарачэньне | ▲120,76 млрд рас.руб[2] (2024 год; 1,187 млрд $)[3] |
| Апэрацыйны прыбытак | ▼8,674 млрд рас.руб (2024 год; 86,1 млн $) |
| Чысты прыбытак | ▼7,269 млрд рас.руб (2024 год; 71,4 млн $) |
| Лік супрацоўнікаў | 4707 (2023 год)[4] |
| Аўдытар | «Тэхналёгіі даверу — Аўдыт» (Масква) |
«Ак Барс» (ад тат. ак барс — «белы барс») — дзяржаўны камэрцыйны банк Расеі, заснаваны ў лістападзе 1993 году ў Казані (Татарстан).
На 2025 год налічваў 166 аддзяленьняў у Расеі і аказваў звыш 100 відаў паслугаў[5]. Быў удзельнікам «Таварыства сусьветнай міжбанкаўскай фінансавай сувязі» (Бэльгія) і «Маскоўскай біржы»[6].
Уласьнікі
[рэдагаваць | рэдагаваць крыніцу]На 2025 год найбольшыя долі паёў у «Ак Барс» Банку мелі:
- Дзяржаўны жыльлёвы фонд пры прэзыдэнце Татарстану — 20 %;
- урад Татарстану — 20 %;
- «Сувязьінвэстнафтахім» — 14 %;
- «Татнафта» — 10 %[7];
- холдынг «Османд» (Кіпр, засн. 2008) — 7 %;
- кампанія «Юл» (Казань, засн. 2013, ген.дыр. Роза Хайруліна) — 7 %;
- «Ікс-Луч» (Масква, засн. 2005, ген.дыр. Мікалай Карпенка) — 6 %;
- «Сінек Інвэстыцыі і Дэвэлапмэнт» (Калінінград, засн. 2019, ген.дыр. Артур Хайрулін) — 5 %;
- Фонд «Туган Іль» (Казань, засн. 2006, ген.дыр. Яўген Яфімаў) — 5 %;
- «Эўрабэст» (Расея) — 4 %;
- «Ніжнякамскнафтахім» (Татарстан) — 2 %[8].
Мінуўшчына
[рэдагаваць | рэдагаваць крыніцу]29 лістапада 1993 году ў Казані (Татарстан, Расея) на ўлік паставілі акцыйны камэрцыйны банк «Ак Барс». Кіраўніцтва разьмясьцілі ў былой гасьцініцы па вуліцы Сьнежаньцаў, дом 1. У ліпені 1994 году «Ак Барс» стаў упаўнаважаным банкам Кабінэту міністраў Татарстану для абслугоўваньня рахункаў ураду. Таксама пачалі выпускаць вэксэлі. У 1995 годзе банк атрымаў дазвол на гандаль валютай, які пашырылі на фізычных асобаў. Сярод іншага, стварылі 22 прадстаўніцтвы «Ак Барс» у Татарстане. Урэшце, Цэнтральны банк Расеі ўлічыў 2-і выпуск паёў «Ак Барсу», па выніках якога статутны капітал банку склаў 20 млрд расейскіх рублёў (4,3 млн даляраў)[9].
У 1997 годзе «Ак Барс» упаўнаважылі захоўваць залаты запас Татарстану. Аплачаны статутны капітал банку склаў 537,6 млрд рас.рублёў (90,2 млн даляраў). 9 ліпеня 1997 году далучаны «Татінфрабанк» пераўтварылі ў Казанскае аддзяленьне «Ак Барсу». Адчынілі першыя 2 аддзяленьні ў Мамадышы і Бугульме. У 1998 годзе банк пераўтварылі ў адкрытае акцыйнае таварыства. «Ак Барс» стаў сябрам «Таварыства сусьветнай міжбанкаўскай фінансавай сувязі» (Бэльгія). Статутны капітал банку павялічылі на 1,5 млрд дэнамінаваных рас.рублёў да 2 млрд рас.рублёў (96,8 млн $). У 1999 годзе «Ак Барс» пачаў рабіць грашовыя пераводы праз амэрыканскае прадпрыемства «Заходні зьвяз» (штат Каларада) і ўступіў у Аб'яднаньне расейскіх банкаў. 30 чэрвеня 1999 году далучылі «Інтэркамабанк». Сярод іншага, банк уступіў у Аб'яднаньне ўдзельнікаў вэксэльнага рынку (АУВР)[9].
У 2000 годзе лік рахункаў юрыдычных асобаў у банку перавысіў 14 000. Пачалі пазычаць на набыцьцё спажывецкіх тавараў. Лік выпушчаных банкам аплатных картак перавысіў 55 000, сярод якіх былі карткі «Эўраплата» (Бэльгія) і «Залатая карона». Таксама «Ак Барс» пачаў выпускаць амэрыканскія аплатныя карткі «Мастэркард» і «Маэстра». У 2001 годзе падпісалі Пагадненьне аб праектным фінансаваньні да 5 млн эўра з «Баварскім іпатэчна-саюзным банкам» (Нямеччына). Таксама атрымалі першую партыю золата вагой 36 кг і прыступілі да пазычаньня малым прадпрыемствам Татарстану. У 2002 годзе падпісалі пазыковае пагадненьне на 15 млн даляраў ЗША з «Райфазэнаўскім цэнтральным банкам Аўстрыі» (Вена). Партфэль пазыкаў ад «Ак Барсу» склаў звыш 5,2 млрд рас.рублёў (163 млн $), а лік яго ўкладнікаў перавысіў паўмільёну. Сярод іншага, падпісалі пазыковае пагадненьне на 25 млн эўра зь «Більбаўска-біскайскім банкам Аргентарыя» (Басконія), які быў найбольшым банкам Гішпаніі[9].
У 2003 годзе банк прыступіў да выдачы іпатэчных пазыкаў у Татарстане. «Ак Барс» прынялі ў «Расейскую гандлёвую сыстэму». Таксама банк заключыў пагадненьне аб выплаце пэнсіяў праз аддзяленьні і сядзібы «Ак Барсу» з аддзяленьнем Пэнсійнага фонду Расеі па Татарстане. У 2004 годзе падпісалі пазыковае пагадненьне наконт 12 млн эўра на 5 гадоў з «Камэрцыйным банкам» Чэхіі. Запусьцілі 1-ю чаргі працэсінгавага асяродку банку. Памер статутнага капіталу вырас да 8 млрд рас.рублёў (288 млн $) за кошт дадатковага разьмяшчэньня паёў на біржы. Стварылі 4 аддзяленьні ў іншых рэгіёнах Расеі ў Чабаксарах (Чувашыя), Марый Эл, Ніжнім Ноўгарадзе і Ўльянаўску. У 2005 годзе банк стаў сузаснавальнікам Нацыянальнага бюро крэдытных гісторыяў і сябрам амэрыканскай аплатнай сыстэмы «Віза» з правам выпуску яе аплатных картак. Запрацаваў асяродак апрацоўкі выклікаў. Сетка банку дасягнула 33-х аддзяленьняў, 61-й сядзібы, прадстаўніцтва і 100 касаў. Абсяг прыватных укладаў перавысіла 10 млрд рас.рублёў (347 млн $)[9].
1 сьнежня 2006 году Цэнтральны банк Расеі ўлучыў «Ак Барс» у 30-ку найбольшых банкаў Расеі. У тым пераліку банк заняў 1-е месца паводле абсягу выдадзеных малым прадпрыемствам пазыкаў, 14-е — паводле памеру ўласнага капіталу, 18-е — паводле сумы чыстых сродкаў і 21-е — паводле прыбытку. Пасьля дадатковага выпуску паёў памёр статутнага капіталу банку перавысіў 19 млрд рас.рублёў (721 млн $). 10 верасьня 2007 году прыцягнулі 100 млн даляраў сумеснай пазыкі ад «Такійскага аб'яднанага банку Міцубісі» (Японія) і інвэстыцыйнага банку «Ліёнскі земляробчы крэдыт» (Францыя). Да 1 кастрычніка 2007 году партфэль раздробных пазыкаў банку вырас на 77 % да 17,3 млрд рас.рублёў (693 млн $). У 2008 годзе сетка банку вырасла да 46 аддзяленьняў, 26 якіх месьціліся па-за Татарстанам у найбольшых гарадах Расеі. На 1 студзеня 2008 году памер прыцягнутых сродкаў фізычных асобаў склаў 24,9 млрд рас.рублёў (1,014 млрд $). У 2008 годзе падпісалі Дамову аб сумесным прадпрыемстве з «Карэйскай нафтахімічнай карпарацыяй» (Сэул) пад прыцягненьне пазыкі на 75 млн даляраў. Таксама банк атрымаў дазвол на эквайрынг у амэрыканскай аплатнай сыстэме «Мастэркард» (штат Нью-Ёрк). Сярод іншага, на біржы разьмясьцілі 3-гадовыя эўрааблігацыі на 300 млн даляраў, на якія паступіла 75 заявак. У 2009 годзе статутны капітал павялічылі на 47 % да 28,2 млрд рас.рублёў (939 млн $)[9].
У 2010-м падпісалі пазыковае пагадненьне на закупку абсталяваньня ў краінах Арганізацыі эканамічнага супрацоўніцтва і разьвіцьця са «Зьвязам банкаў Швайцарыі» (Цюрых) пад паруку экспартных пазыковых службаў тых краінаў. 12 верасьня 2011 году заключылі першую ў Расеі ісламскую ўгоду мурабаха з прыцягненьнем 60 млн даляраў. 13 ліпеня 2012 году разьмясьцілі эўрааблігацыі на 600 млн даляраў пад 8 % гадавых з пагашэньнем у 2022 годзе пры дапамозе «Швайцарскага крэдыту» (Цюрых). 19 лістапада 2012 году выпусьцілі эўрааблігацыі на яшчэ 500 млн даляраў пад 8,75 % гадавых з пагашэньнем у 2015 годзе. Па выніках 2012 году «Ак Барс» павялічыў выдачу іпатэчных пазыкаў на 102 %, што дазволіла банку заняць 8-е месца паводле ліку такіх выдадзеных пазыкаў і 9-е месца паводле іх абсягу ў Расеі. 5 ліпеня 2013 году прадставілі наручны гадзіньнік з убудаванай аплатнай карткай «Мастэркард», які дазваляў рабіць пакупкі на суму да 1000 рас.рублёў (30 $) без пэрсанальнага ідэнтыфікацыйнага нумару[9].
29 студзеня 2014 году прыцягнулі 100 млн даляраў ад 11 замежных банкаў на ісламскіх умовах мурабахі. 11 сакавіка 2015 году запусьцілі мабільны дастасунак пад «Андроід» і «айОС» для аплаты анлайн. 6 жніўня 2015 году выпусьцілі 3-гадовыя эўрааблігацыі на 1,5 млрд $ пад 8 % гадавых. 16 лістапада 2015 году «Ак Барс» далучыўся да сумеснай пазыкі «Банку разьвіцьця Беларусі» на 160 млн даляраў ад 7 іншых расейскіх банкаў. 1 сьнежня 2015 году заключылі першае пагадненьне аб пазыцы пакупніку на 1 млн рас.рублёў (14 тыс. $) зь «Белгазпрамбанкам» як банкам Беларусі пры страхаваньні ад «Эксару». 23 сакавіка 2016 году ўвялі грашовы перавод з карткі на картку праз вэб-бачыну. 27 чэрвеня 2017 году статутны капітал павялічылі праз дадатковы выпуск паёў да 48 млрд рас.рублёў (833 млн $). 21 жніўня 2017 году ўвялі рэфінансаваньне пазыкаў у іншых банках пры ўмове папярэдніх своечасовых 6 штомесячных выплатаў. 27 сьнежня 2018 году «Ак Барс» арганізаваў сумесную пазыку «Беларусбанку». 6 лютага 2019 году заключылі 1-ю ўгоду з банкам Узбэкістану, 13 сакавіка — з банкам Армэніі, а 3 чэрвеня — з банкам Казахстану. 28 сакавіка 2019 году прадставілі службу бескантактай аплаты «Мір» для смартфона. 23 красавіка 2019 запусьцілі мабільны дастасунак для ўкладаньняў, а 24 красавіка — ісламскую іпатэку ў растэрміноўку[9].
10 лютага 2020 году «Ак Барс» стаў суарганізатарам 1-га выпуску аблігацыяў лесапрамысловага холдынгу «Сягежа». 10 чэрвеня 2021 году выступіў суарганізатарам сумеснай пазыкі на 1,25 млрд даляраў «Уралкалію». 21 кастрычніка 2021 году запусьцілі паслугі факторынгу. 9 лістапада 2022 году запусьцілі ўклад у кітайскіх юанях для фізычных асобаў[9].
Кіраўнікі
[рэдагаваць | рэдагаваць крыніцу]Старшыні Рады кіраўнікоў:
- Робэрт Мінегаліеў (2003 — 31 траўня 2013)
- Валеры Сарокін (ад 31 траўня 2013 году)[9]
Старшыні Ўправы:
- Робэрт Мінегаліеў (2003 — кастрычнік 2015)
- Зуфар Гараеў (ад 9 лістапада 2015 году)
Крыніцы
[рэдагаваць | рэдагаваць крыніцу]- ^ Зьвесткі для сувязі (рас.) // ПАТ «Ак Барс» Банк, 2025 г. Праверана 26 сакавіка 2025 г.
- ^ Натальля Косава, Т.Р. Карымаў. Кансалідаваная фінансавая справаздачнасьць за 2024 год згодна з МСФС і аўдытарскія высновы (рас.) // ПАТ «Ак Барс» Банк, 21 сакавіка 2025 г. Праверана 26 сакавіка 2025 г.
- ^ Афіцыйныя курсы валютаў на зададзеную дату, якія ўсталёўваюць штодзень (101,6797 рас.рублі за даляра) (рас.) // Цэнтральны банк Расеі, 31 сьнежня 2024 г. Праверана 26 сакавіка 2025 г.
- ^ Справаздача за 2023 год (рас.) // ПАТ «Ак Барс» Банк, 14 сакавіка 2025 г. Праверана 26 сакавіка 2025 г.
- ^ Пра банк (рас.) // ПАТ «Ак Барс» Банк, 2025 г. Праверана 26 сакавіка 2025 г.
- ^ Агульныя зьвесткі (рас.) // ПАТ «Ак Барс» Банк, 2025 г. Праверана 26 сакавіка 2025 г.
- ^ «Ак Барс» Банк (рас.) // АТ «Сбондс.ру» (Санкт-Пецярбург), 2025 г. Праверана 26 сакавіка 2025 г.
- ^ Уласьнікі «Ак Барс» Банку (рас.) // Прадпрымальніцкі партал «Бычыны рог», 2025 г. Праверана 26 сакавіка 2025 г.
- ^ а б в г д е ё ж з Гісторыя (рас.) // ПАТ «Ак Барс» Банк, 2025 г. Праверана 26 сакавіка 2025 г.
Вонкавыя спасылкі
[рэдагаваць | рэдагаваць крыніцу]- Сядзібы (рас.) // ПАТ «Ак Барс» Банк, 2025 г. Праверана 26 сакавіка 2025 г.
- Навіны і анлайн-банк (рас.)