Агракліматычнае раянаваньне Беларусі

Агракліматы́чнае раянава́ньне Белару́сі — падзел тэрыторыі Беларусі па ступені спрыяльнасьці кліматычных умоваў для земляробства. Пры падзеле бяруцца пад увагу такія чыньнікі, як сярэдняя тэмпэратура вэгетацыйнага пэрыяду, працягласьці інтэрвалаў з асобнымі тэмпэратурамі паветра і гадавых сум ападкаў.

Агракліматычныя вобласьці і раёны Беларусі

Выдзяляюць 3 агракліматычныя вобласьці:

I. паўночная ўмерана цёплая вільготная;

II. цэнтральная цёплая умерана вільготная;

III. паўднёвая цёплая няўстойліва вільготная.

Для кожнай з гэтых абласьцей вызначана спрыяльнасьць агракліматычных умоваў для вырошчваньня тых ці іншых сельскагаспадарчых культураў. У адпаведнасьці з нарошчваньнем кантынэнтальнасьці клімату ў складзе кожнай з абласьцей выдзяляюць заходнія і ўсходнія пад-вобласьці (на малюнку пункцірная лінія з поўначы на поўдзень). Апошнія ў сваю чаргу падзяляюцца на раёны:

1. Ашмяна — Менска — Сьвянцянскі;
2. Нарачана — Вялейскі;
3. Ушацка — Лепельскі;
4. Полацкі;
5. Асьвейска — Браслаўскі;
6. Гарадоцка — Віцебскі;
7. Сураска — Лучоскі;
8. Аршанскі;
9. Гарадзенска — Івацэвіцкі;
10. Лідзка — Івянецкі;
11. Наваградзкі;
12. Баранавіцка — Ганцавіцкі;
13. Барысаўска — Рудзенскі;
14. Бярэзінскі;
15. Горацка — Касьцюковіцкі;
16. Пружана — Берасьцейскі;
17. Пінскі;
18. Жыткавіцка — Мазырскі;
19. Гомельскі.

Зьмены

У 1973 г. беларускі географ Абрам Шкляр (1910-1977) выдаў кнігу «Кліматычныя рэсурсы Беларусі і іх выкарыстаньне ў сельскай гаспадарцы». Ад таго часу да 2010 году на поўначы краіны сярэднегадавая тэмпэратура павысілася на 1 °С, што дазваляе там цяпер вырошчваць кукурузу і сланечнік. Паўночная агракліматычная вобласьць зьменшылася больш як удвая. Межы паўднёвай і цэнтральнай зрушыліся на 150 кілямэтраў на поўнач.

Літаратура

• Энцыклапедыя прыроды Беларусі: у 5 т. Т. 1: Ааліты ― Гасцінец / Рэдкал.: І. П. Шамякін (галоўны рэдактар) і інш. — Мн.: БелСЭ, 1983. — 574 с.: іл., С. 28—29

Глядзіце таксама

• Агракліматычнае раянаваньне